Qujaukitsoq COP21-eqarnermi ataatsimeersuaqataasoq

Silap kissakkiartornera akiorniarlugu nunarsuaq tamakkerlugu FN-ip ataatsimeersuartitsinerani Aningaasaqarnermut Aatsitassanut Nunanullu Allanut Naalakkersuisoq ataatsimut katersuunnermi peqataavoq.

Naalakkersuisoq Vittus Qujaukitsoq arfininngornermi decemberip tallimaani Parisimut apuuppoq, tassani isumaqatiginninniarnissani Kalaallit Nunaat sinnerlugu peqataassalluni. Silap kissakkiartornera akiorniarlugu nunarsuaq tamakkerlugu FN-ip ataatsimeersuartitsinerani ataatsimut katersuunnermi arfininngornermi pisumi Vittus Qujaukitsoq peqataavoq. Ataatsimut katersuunneq Frankrigip nunanut allanut ministeriata Laurent Fabiusip upernaaq manna martsimi Kalaallit Nunaannut tikeraartup COP-imilu siulittaasuusup ammarpaa.

Ataatsimut katersuunnermi silap allanngoriartornera akiorniarlugu isumaqatigiissutissatut siunnersuut sapaatip akunnerata ingerlanerani ulloq unnuarlu atorfilittanit nunanit 195-eersunit ulapputigineqarsimasoq arfininngornermi decembarip tallimaani ammaalluni oqalugiarnermi saqqummiunneqarpoq. Sapaatip akunneri aggersut qinikkat inatsisitigut pisussaaffiliisumik isumaqatigiissummik suliaqarlutik isumaqatigiinniassapput. Tallimanngorpat imaluunnit sapaatip akunnerata tulliata naanerani silap allanngoriartornera akiorniarlugu isumaqatigiissummik angusaqartoqarsimanissaa neriuutigineqarpoq.

Politikkikkut isumaqatigiinniarneq ingerlatissallugu nunarsuarmi tamaneersut ministerit sapaammi Parisimut tikissapput.

Nunat Naalagaaffiillu Nunasiaasimasut Kattuffiat (OCTA) Kalaallit Nunaata ilaasortaaffigisaa ataani aaqqissuussinermi Kalaallit Nunaanni silap kissakkiartornerata unammillernartortai pillugit Vittus Qujaukitsoq ilaatigut oqalugiaateqarpoq.

COP21-mi nunat OLT-mut ilaasortaasut peqataanissaat pingaaruteqarpoq, taamaalillutik Kalaallit Nunaannit Manerassuaq ilanngullugu qeqertat peqataatitaqartut silap allanngoriartornerani nunat taakku misilittakkatik annertuut oqaluttuarisinnaaniassammatigit. Vittus Qujaukitsoq naqissusiivoq ilisimatuussutsikkut misissuinernut naleqqiussamik inuit pisariaqartitsinerat isiginiarneqartariaqartoq.

Ataatsimeersuarnermi Vittus Qujaukitsoq ilaatigut ima oqariartuuteqarpoq:

”Silap allanngoriartorneranut inuit qanimut misigisaqarlutillu malinnaasut tusaaniarneqarnissai pingaaruteqarluinnarpoq, tassuunakkut misigisaat paasisaat misilittagariligaallu akiuiniarnermi atorluarneqarsinnaasut ilinniarfigineqarsinnaaniassammata. Tassuunakkut taamaallaat silap pissusaata allanngoriartornerata nunarsuarmut sunniutai tamakkiisumik takunniffigisinnaalissagatsigu.”

FN-ip nunarsuaq tamakkerlugu silap pissusaata allanngoriartornera akiorniarlugu Parisimi ataatsimeersuartitsinerani inuit 60.000-nit ikinnerunngitsut, taamatullu aallartitat 25.000-nit ikinnerunngitsut peqataapput.

Vittus Qujaukitsup oqalugiaataa (tuluttut)

Paasissutissanik annertunerusunik pisariaqartitsigussi attavigisinnaavarsi: Immikkut siunnersorti Pernille Bengtsen, Nunanut Allanut Pisortaqarfik oqarasuaat +299 55 33 27 / +45 60 62 31 24 .