Naalakkersuisut Isumaginninnikkut Siunnersuisunik ilinniartitsinissaq suliniuteqarfigivaat

Naalakkersuiusut suliassaasa pingaarnerit ilagivaat isumaginninnerup iluani sullissisunik – matumani meeqqanut inuusuttunillu sullissinerni isumaginnittussanik ilinniareersimasuniinnerusunik ingerlatsiviusussaq.

Taamaattumik Ilaqutariinnermut, Naligiissitaanermut Isumaginninnermullu Naalakkersuisup Martha Lund Olsen-ip nuannaarutigivaa Piffinni Isumaginnittussanik ilinniartitsinerit aallartilluarsimanerat. Ilinniartitaanerup immikkoortuata aappaannik aallartittoqarneranut tunngatillugu imak oqaaseqarami: ”Nuannaarutigaara piffissap sivikitsuinnaap ingerlanerani piffinni isumaginninnikkut siunnersortinik ilinniartitsisinnaalersimagatta, aammalu amerlasuut taamatut ilinniarnissartik aallartikkusussimammassuk.”

Piffinni ilinniartitsisarnerup aallartinneqarneranut siunertaavoq isumaginninnerup iluani sulisooreersut aammalu suli piginnaaneqalerusuttut ilinniaqqinnissamut periarfissinnissaat. Taakkununngami oqimaassinnaammat ukiuni 3 ½-ni taamatut ilinniariartorniarluni Nuummut nuunissaq, tamatumani siunertaralugu isumaginninnikkullu batchelor-itut ilinniagaqarnissaq.

Piffinni ilinniagaqarnissamut tigusaannissamut piumasaqaataavoq atorfeqareer-nissaq aammalu ukiuni 2-ni minnerpaamik inuussutissarsiuteqarnermik misilittagaqarnissaq. Tassalu rådgivningsassistentitut, isumaginninnermi assistentitut imaluunniit allatut assingusumik ilinniagaqareersimanissaq piumasaqaataalluni.

Piffinni isumaginninnikkut ilinniartitaaneq aaqqissuussaanermigut Ilisimatusarfimmut, Ilimmarfik Instituttimut attuumassuteqartuuvoq. Isumaginninnikkut Immikkoortortaqarfiup ilinniartitaaneq akisussaaffigivaa. Ukioq manna augustip qaammataani ilinniagaqartut nutaat 30-t alloriarfik siulleq ilinniarfigalugu aallartippaat.

Ilinniartitaaneq ukiunik 4½-inik sivisussuseqartussaavoq. Ukiut pingasut siulliit alloriaqattaarnikkut immikkullu naamassiffiusinnaasutut ingerlaffiussapput. Ilinniartitaanikkut matumani naamassinnittut imminnut taaguusersinnaanngussapput: Isuginninnerup iluani Siunnersortitut Sullissisoq.
Ilinniarnerup naammassiartornerani ukiut 1½-t Ilisimatusarfimmi ingerlanneqartussaapput, tassanilu ilinniarneq ilinniagaqartut allat peqatigalugit ingerlanneqassalluni. Taamaapporlu piffinni isumaginninnerup iluani siunnersortitut ilinniagaqartut aallartissallugu periarfissarisassaat.

”Ilinniagaqarnermik aallartittut akornanni 50%-it Qaasuitsup Kommunianinngaanneersuupput, tamannalu Qaasuitsup Kommunianik immikkut nersualaarutissaavoq. Tassuunami takutimmassuk sulisorisamik ilinniagaqarluarnermikkut suliassaminnik kivitsilluarnerusinnaalernissaat” taamatut naggasiivoq Martha Lund Olsen.

Suli annertunerusumik paasisaqarusukkuit attaveqarfigisinnaavat, Naalakkersuisup allattaa Sina Møller Kristiansen, oqa . (+299) 34 69 49 email nimk@nanoq.gl