Issittup imartaani siunissami aalisartoqalersinnaanera

Issittup imartaani siunissami aalisartoqalersinnaanera pillugu Washington, D.C.-mi ataatsimiissimaneq.

Ulluni 1. – 3. december 2015-imi Issittup imartaani siunissami aalisartoqalersinnaanera pillugu nunat assigiinngitsut akornanni atorfilittatigoortumik aallarnisaataasumik oqaloqatigiittoqarpoq. Oqallinnerit naalagaaffiit Issittumi sineriallit tallimat akornanni Issittup imavittaata qiterpasissuanut nalunaarutaannik juli 2015-imeersumik nangitsinerupput peqatigitillugulu nunanik oqalliseqataasunik amerlisitsinerullutik.

Washington, D.C.-mi ataatsimiinnermut peqataapput Issittumi naalagaaffiit sineriallit tallimat ukuusut USA, Canada, Rusland, Kalaallit Nunaat aamma Norge, taakkulu saniatigut EU, Sydkorea, Kina, Japan aamma Island. Ataatsimiinnermi nunat akornanni Issittup imartaani siunissami aalisartoqalersinnaanerata illersorneqarnissaa sulissutigineqartarnissaalu pillugit isumaqatigiinniarluni oqallinnerit aallartinneqarsinnaanerata periarfissaanera eqqartorneqarpoq. Issittup imartaa imaavoq ammaannartoq nunat oqartussaaffiisa avataanniittoq ilaatigut Naalagaaffiit Peqatigiit Imaanut pisinnaatitaaffiit pillugit isumaqatigiissutaatigut malittarisassaqartitaasoq. Siullermeerutaasumik peqataasut naalagaaffinnik allanik soqutiginnissinnaasunik ilaqartilerlugit amerlineqarput. Eqqarsaataavoq taamatut oqallittarnerit ukiuni aggersuni ingerlaqqissasut Issittup imartaani aalisartoqalernissaa pillugu nunat tamalaat isumaqatigiissuteqarnissaat angutserlugu.

Tamani uumassusillit qanoq innerat uumasuusinnaasullu allat pillugit ilisimatuussutsikkut ilisimasat killeqarluinnarput ataatsimiinnermilumi ilisimatuussutsikkut suleqatigiinnerup ingerlaqqinnissaa annertusineqarnissaalu assut sammineqarput. Taamaammat taamatut suleqatigiinneq ukiuni aggersuni annertusarniarneqarpoq. Suli siusippallaarpoq oqaatigissallugu tamaani aalisagaqarnersoq siunissamilumi qaninnerusumi tamaani iluanaarniutigalugu aalisartoqalernissaa oqaatigineqareersinnaanngilaq. Silap pissusaata allanngorneranik pissuteqartumik taamaattoq pingaaruteqarpoq allanngoriartorneq sillimaffigeriissallugu aalisakkanillu isumalluutit piujuartitsinissamik tunngaveqarluni iluaqutigineqarnissaat pillugu nunat tamalaat isumaqatigiissuteqareertinnagit aalisartoqalissappat aalisarnermik aallartitsisoqannginnissaa.

Kalaallit Nunaat ataatsimiinnermi Aalisarnermut, Piniarnermut Nunalerinermullu Naalakkersuisoqarfimmit, Washingtonimi Aallartitaqarfimmit Nunanut Allanut Pisortaqarfimmiillu sinniisuutitaqarpoq. Tamassuma saniatigut Nunanut Allanut Ministeriaqarfimmit aamma Savalimmiut Landsstyreannit sinniisut peqataapput.

Ataatsimiinneq USA-mit, siulittaasuutitat nalunaarutaannik uani ilanngunneqartumik suliaqarsimasumit.

Attaveqarfissaq: Birgitte Jacobsen, Aalisarnermut, Piniarnermut Nunalerinermullu Naalakkersuisoqarfik, oqarasuaat: 553306 imaluunniit 345346