Naalakkersuisooqatigiit isumaqatigiissutaat

Attaveqarnermut aningaasaliinissat pillugit Naalakkersuisooqatigiit aammalu Naalakkersuisoq Vittus Qujaukitsup isumaqatigiissutaat.

Pinngasunngornermi unnunnerani Naalakkersuisooqataasut partiit pingasut isumaqatigiissummik atsioqatigiipput, ukiuni aggersuni mittarfinnut aningaasaliinernut annertuunut sinaakkutissiuussisussamik.

”Isumaqatigiissut oqaluttuarisaanermut pingaaruteqarpoq”, Vittus Qujaukitsoq oqarpoq, nangillunilu:
”Isumaqatigiissuteqarnikkut partiit Naalakkersuisooqatigiit aammaarlutik takutippaat, ataatsimoorlutik aaqqissueqqissaarnernut annertuunut sinaakkusersuisinnaallutalu piffissaliisinnaalluta, tamannalu Naalakkersuisooqatigiit Siumut, Demokraatit Atassullu isumaqatigiissuteqarneratigut pisinnaavoq”.

”Isumaqatigiissuteqarnikkut immitsinnut politikkikkut assammippugut, piaarnerpaamik Ilulissani, Nuummi, Tasiilami, Qaqortumi ajornanngippallu Ittoqqortoormiini mittarfiliorneq aallartinneqarnissaa isumaqatigiissutigalugu. OPP-nik isumaqatigiissuteqarnikkut sapinngisamik mittarfinnik aningaasaliinerit pissapput, taamaalillutami avataaniit aningaasaliinernik misilittakkanillu tunineqarnissarput qulakkiissagatsigut.

Aatsaavissuaq partiit pingasuk sapiissuseqarlutik taamak annertutigisumik nunatsinni attaveqarneq pillugu isumaqatigiissusiortoqarpoq. Siunissami attaveqarnerup ineriartornera aallartisarparput, tulluusimaarutigaaralu suliami peqataasimagama.”.

Nuummi Ilulissanilu mittarfiit minnerpaamik 2200 meterinik takissuseqalernissaat pilersaarusiornermut aallaaviussaaq, Tasiilamilu Qaqortumilu mittarfiit minnerpaamik 1499 meterinik takissusillit pilersaarusiornermut tunngavigineqassalluni. Ittoqqortoormiit 650 meterimik takissusilimmik mittarfittaarnissaa pilersaarusiornernut aallaaviussaaq.

”Inatsisartut mittarfiit pineqartut piaarnerpaamik sananeqarnissaanut ataatsimoortumik pilersaarusiornissaat anguniagaraarput, kingusinnerpaamik 2018-mi atorneqarnissaminnut piareerlutik”, Aningaasaqarnermut Naalakkersuisoq, Vittus Qujaukitsoq oqarpoq.

Isumaqatigiissuteqarnikkut Qasigiannguani, Kangaatsiami, Qeqertarsuarmi, Uummannami Narsamilu naatsunik mittarfittaarnissamut tatiginartumik tunngaviliisoqarpoq. Mittarfiit uku sananeqarnissaanut pilersaarutit piaarnerpaamik aallartisarneqassapput.

Mittarfinnut tunngasut saniatigut, aammattaaq erngup nukinganik nukissiorfiit aammalu siunissami nukinik pilersuinerup qulakkeernissaa pitsanngorsaavigineqarnissai, kiisalu uulia tunngavigalugu atuinngitsumik nukinik pilersuineq siuarsarnissaa, isumaqatigiissummi ilaapput. Tamanna pillugu isumaqatigiissummi annertunermik paasisaqartoqarsinnaavoq. Isumaqatigiissut tusagassiorfinnut nalunaarummut kakkiunneqarpoq. Isumaqatigiissut Naalakkersuisut nittartagaannut ikkunneqarumaarpoq.

Isumaqatigiissut piffissami qaninnermi Naalakkersuisunut saqqummiunneqassaaq, Naalakkersuisullu isumaqatigissutip piviusunngortinnissaanut isummersussallutik.

Annermik paasissutissat: Attavigiuk tusagassiorfinnut ataqatigiissaarisartoq Martin Christiansen, oqarasuaat: 221533.