Saarullittassiissutit ilaneqarput

Sinerissap qanittuani saarullittassiissutit ilaneqarput

Aalisarneq tunitsivillu ukiup sinneranut ingerlaannarnissaat qulakkeerumallugu Naalakkersuisut, ullumi decembarip sisamaanni 2015-imi, aalajangerput sinerissap qanittuani saarullittassat 2.500 tonsinik ilaneqassasut. Taamaalilluni ukioq maannamut saarullittassiissutigineqartut 25.000 tonsiusut 27.500 tonsinngorput.

- Saarullinniarneq ukiup sinneranut maannakkut unitsinneqarpat, tamanna sumiiffinnut  suliffissaaleqinermik aningaasarsiorfissaaleqinermillu angisuumik kinguneqassaaq. Taamaattumik saarullittassiissutit Naalakkersuisut amerlivaat, Aalisarnermut, Piniarnermut Nunalerinermullu Naalakkersuisoq, Karl-Kristian Kruse oqarpoq.

Ataatsimeeqatigiinnissaq

Naalakkersuisup aalisarnermik assigiinngitsunik soqutigisalinnik ataatsimeeqateqarniarpoq, siniussami pisassiisarnerit pitsaanerusumik paasinneqatigiinnerullunilu oqaloqatigiissutigisarnissaat pillugit.  

- Aalisarnermut Siunnersuisooqatigiit aamma partiit siulittaasui biologillu siunissami pisassiisarnissat pillugit ataatsimeeqatiginissaannut januaarimi aggersarniarpakka. Ataatsimiinnermi aamma oqaluuserineqassalluni biologit siunnersuutaat qanoq atorneqartassanersut, tamatumani pisassiissutit aamma siunnersuinerit isumaqatigiissutigineqartannginnerinut suna pissutaasarnersoq,

Aalisarnermut, Piniarnermut Nunalerinermullu Naalakkersuisoq, Karl-Kristian Kruse erseqqissaavoq.

 

Attavigineqarsinnaavoq Aalisarnermut, Piniarnermut Nunalerinermullu Naalakkersuisoqarfimmi allaffimmi pisortaq, Jóhanna Lava Køtlum. E-mail: jool@nanoq.gl