Innuttaasoq qitiutillugu aamma inuiaqatigiit nukittorsarneqarnissaat

Soqutiginnittunut isumasioqatigiissitsineq ”Innuttaasoq qitiutillugu aamma inuiaqatigiit nukittorsarneqarnissaat”

Isumasioqatigiinneq Nuna Tamakkerlugu Innarluutilinnut Sullissiviup pilersinneqarnissannut atatillugu Ilulissani ingerlanneqarpoq, ulluni 2. – 4. December.

Katillugit inuit 35-t isumasioqatigiissitsinermi peqataapput; ulloq unnuarlu angerlarsimaffinni/najugaqaqatigiiffinni siulittaasut, innarluutillit soqutigisaqaqatigiiffiinit aallartitat, sullissisartut, innarluutilinnut ataqatigiissaarisut, tagiartuisartut il.il. kommuninit sisamaasunit tamanit.

Isumasioqatigiinnermi sammisat ilaatigut makkuupput: innarluutillit pillugit isumaqatigiissut – qanoq ililluta tamakkununnga tunngasutigut suleqataasunut attuumassutillinnut suleqatigiiffissatut periarfissat pilersissavagut? Innarluutilinnut kattuffissuit – qanoq ililluta akimortumik pitsaanerpaamik suleqatigiissinnaavugut? Nuna Tamakkerlugu Innarluutilinnut Sullissivik – ineriartorneq, periarfissat siunissarlu. Aammalu Human Insight-imiit isummernissamut tunngavissiamik saqqummiineq ’Inuunerup naliginnaasup killingani’ tunngasumik.

Naalakkersuisoq Martha Lund Olsen inuulluaqqusilluni nalunaarutimini imatut ilaatigut oqaaseqarpoq: ”Taamaattumik nuannaarutigaarput isumasioqatigiinnermi matumani peqataasinnaagassi, taamaasillusi periarfissaqassagassi innarluutillit pillugit nalunaarusiassap inatsisissallu imarisassaannut sunniuteqaqataanissamut. Pingaaruteqarpormi ilissi tusaaniarneqarnissarsi, taamaasillunilu suliniuteqarnissani pingaaruteqartuni aamma uagut tunngavigissaarsinnaaniassagatta.”

”Taamatut oqaaseqarlunga neriuppunga aqagu decembarip 3-ani silarsuaq tamakkerlugu innarluutillit ulluanni ullorsiorluarumaartusi.”

Paasissutissanik allanik perusukkuit Martha Lund Olsen, naalakkersuisup allattaa Sina Møller Kristiansen aqqutigalugu oqarasuaammut 53 93 71-imut attaveqarsinnaavutit.