Sukumiisumik nalunaarsuineq

GMEp sukumiisumik nalunaarsuinera 2015imi novemberip 23anit takuneqarsinnaalerpoq

Sukumiisumik nalunaarsuineq GMEp Kuannersuarni suliniutaanut atatillugu ulluni 35ni piareersaataasumik tusarniaanermut akissutinik apeqqutinillu takkuttunik imaqarpoq. Sukumiisumik nalunaarsuineq tusarniaanermut oqaaseqaatinut, akissutinut nalunarutinnguanullu allagaavoq uppernarsaat, akissutillu attuumassuteqartut aamma siunnersuutit Inuiaqatigiinnut Kingunerisassai pillugit Misissueqqissaarnermut inaarutaasumut ilanngunneqassapput.

GMEp Kuannersuarni suliniutitut pilersaarutaanik allaaserisaq siorna 2014-imi oktoberimi ulluni 35-ni piareersaataasumik tusarniaassutigineqarpoq.
Soqutigisaqatigiit inuiaqatigiillu siusinaartumik suliniummut tunngatillugu VSBinut VVMinullu nalunaarusiassanut misissueqqissaartoqarnissaanut sunniuteqarsinnaanissaannut periarfissinniarlugit ulluni 35-ni piareersaataasumik tusarniaasoqarpoq.

”GMEp Kuannersuarni suliniutaa pillugu ulluni 35ni piareersaataasumik tusarniaaneq, piareersaataasumik tusarniaasarnerni siullerpaajuvoq, tassanilu anguniarneqarpoq inuiaqatigiit suliniutip aallartisarnerani siusinaartumik peqataatinneqarnissaat”, Inuussutissarsiornermut, Suliffeqarnermut Niuernermullu Naalakkersuisoq Randi Vestergaard Evaldsen oqarpoq.

Naalakkersuisut tusarniaanernut quppersagaanni sukumiisumik nalunaarsuineq nassaarineqarsinnaavoq, aamma 2014-imi oktoberimi piareersaataasumik tusarniaassutigineqartut nanineqarsinnaapput. Kiisalu tusarniaanermut akissutit ilaatigut ukunanngaanneersut takuneqarsinnaapput Narsami savaatillit peqatigiiffiat, ICC, KANUKOKA, KNAPK allallu.

Annerusumik oqaaseqartitsiniaraanni attavissaq: Naalakkersuisoqarfimmi pisortaaneq Jørn Skov Nielsen, telefon +299 55 61 88 email: jsn@nanoq.gl