Piffiit nutaat siunissatsinniipput – Attaveqaqatigiinnerup nunarput ataatsimuulersissavaa

Inatsisartut ukiaanerani ataatsimiinnerminni ullormi kingullermi, pingasunngorneq 2. December 2015 aalajangiiffigisassatut siunnersuutit marluk imm. 18 aamma 167 taasissutigalugit akuersissutigaat, taakkulu tassaapput nunatsinni silaannakkut angallannerup siunissaanut tunngassuteqartut, Naalakkersuisut siunnersuutaata taasissutigineqarnerani ataasiinnaq akerliulluni taasivoq.

Ineqarnermut, Sanaartornermut Attaveqaqatigiinnermullu Naalakkersuisoq, Knud Kristiansen nuannaarluni oqilisimaarlunilu Inatsisartut Sanaartornermut Ataatsimiititaliaat siunnersuutinut atatillugu siunnersuutinut tapertaalluarlutik suliarujussuat pillugu nersualaarpaa:

”Naalakkersuisut sulissutigissavaat, Ataatsimiititaliap angorusutai, takorluugai aammalu piumasaqaatai ilanngullugit piviusunngortissallugit, nunatsinni silaannakkut angallannermi attaveqaqatigiinnerup annertoorujussuarmik ineriartortinneqarnissaanut atatillugu. Pilersaarut ataatsimut isigalugu tassaavoq mittarfiit tallimat pineqartut aammalu nunap immikkoortuini mittarfiit minnerit eqaatsumik pisariitsumillu ataqatigiissitsilertussat.”

Aalajangiiffigisassatut siunnersuutit pineqartut innersuussutigalugit, Knud Kristiansen oqarpoq, Naalakkersuisut nakimanatik isumagigaat nunarput tamakkerlugu silaannakkut angallannikkut pisariillisarneqassasoq pitsaanerulersinneqassasorlu, taamatuttaaq silaannakkut angallassinermi attaveqaqatigiinnerup ilusissaa aqqutigalugu anguniagaavoq eqaannerusumik angalasoqarsinnaalissasoq aammalu inuiaqatigiinnut tamanut aaqqiissutit pisariitsut.

Mittarfiit ataasiakkaat pillugit tulleriaarinissamut tunngatillugu, Knud Kristiansen oqarpoq, suliniutit ilai piareersarluarneqareersut suliarilluarneqalereersullu:

”Naalakkersuisut aammalu Sanaartornermut Ataatsimiititaliaq isumaqatigiipput, Ilulissani aammalu Nuummi mittarfiit salliutillugit suliarineqassasut, taakkumi misissuiffigeqqissaarneqareernerat annikitsuunngimmat, imminut akilersinnaassusaat ataatsimut isigalugu annertummat tallineqareerlutillu atorneqalerpata pilersaarummi suliniutinut aningaasarsiornikkut imminut akilersinnaassutsimikkut annikinnerusumik inissisimasunut aningaasalersueqataasinnaammata.”

Ineqarnermut, Sanaartornermut Attaveqaqatigiinnermullu Naalakkersuisoq aqutsisoqatigiinnik siunissami qaninnermi pilersitsissaaq, taakku Naalakkersuisut anguniagaannik, tassalu tutsuiginartumik, pissutsinut naleqquttumik aammalu ataqatigiissumik silaannakkut angallannerup nunarput tamakkerlugu ineriartortinneqarnissaanik Naalakkersuisut anguniagaannik ataqatigiissaarineq suliassarissavaat. Silaannakkut angallassinermi suliniummut pilersaarusiorneq, misissueqqaarnerit ilaalu ilanngullugit 2016-ip aallartinnerani suliaralugit aallartinneqassapput.

Sukumiinerusumik paasissutissanik pissarsiniarnermi attavissaq: Naalakkersuisup allattaa Jensine Berthelsen +299562303 jebe@nanoq.gl