Tapiissutit malittarisassallu pillugit pikkorissarneq

Ineqarnermut tapiissutinut utoqqalinersianullu malittarisassat nutaat pillugit kommunini sullissisut pisortallu 70-it sinnerlugit amerlatigisut peqataassapput

Ineqarnermut tapiissutinut utoqqalinersianullu malittarisassat nutaat kommunini sullissisut pisortallu 70-it sinnerlugit amerlatigisut ulluni pingasuni aggersuni misissussavaat.
Ilaqutariinnermut, Naligiissitaanermut Isumaginninnermullu Naalakkersuisoqarfiup pikkorissarneq kommuninit tamanit peqataaffigineqartussaq aaqqissuussarivaa.

Ineqarnermut tapiissutinut utoqqalinersianullu malittarisassat nutaat, 2015-imi Inatsisartut ukiaanerani ataatsimiinneranni akuersissutigineqartut Naalakkersuisullu aaqqissuusseqqinnerannut ilaasut, ukiup nutaap aallartinnerani atuutilertussat kommuninit piareersimaffigineqarnissaat pikkorissaanerup siunertarivaa.

Pikkorissarnermi malittarisassat nutaat misissorneqassapput, soorluttaaq ineqarnermut tapiissutinut utoqqalinersianullu tunngatillugu sullissinermi malittarisassat nutaat qanoq atorneqartarnissaannik peqataasut aqqutsissiuunneqarumaartut.
Aammattaaq oqaatsit nutaat isumaat qanoq isumaqarnersut peqataasut paasissavaat, soorlu “isertitat massakkut atuuttut” aamma “sulerulussimasut” pillugit suut pineqarnersut sulinermilu qanoq paasineqassanersut. Oqaatsit malittarisassani nutaani pingaaruteqarluinnartut.

“Kommunini sullissisut pisortallu malittarisassanik nutaanik sulinerminni atuisussat paasinnilluarnissaat pingaaruteqarpoq, taamaasilluni kommunit innuttaasunut pitsaasumik sullissisinnaaniassammata” Ilaqutariinnermut, Naligiissitaanermut Isumaginninnermullu Naalakkersuisoq Martha Lund Olsen oqarpoq nangillunilu, “Taamaattumik taamatut ittunik pikkorissaatitsivugut – soorluli malittarisassat nutaat atuutilerpata, kommunit assersuutigalugu malittarisassat nutaat qanoq paasinissaannik nalornilissagaluarpata kommuninit apeqqutit akisarumaarivut” naggasiilluni oqarpoq.

Paasissutissanik allanik perusukkuit Martha Lund Olsen, naalakkersuisup allattaa Sina Møller Kristiansen aqqutigalugu oqarasuaat 53 93 71-imut attaveqarsinnaavutit.