Peqissutsimut Naalakkersuisoqarfik pisortartaartoq

Naalakkersuisut ullumi aalajangerput Peqqissutsimut Naalakkersuisoqarfimmi pisortatut atorfik cand.scient. Lone Nukaaraq Møllerimut neqeroorutiginiarlugu. Lone Nukaaraq Møller Peqqissutsimut Naalakkersuisoqarfimmi pisortatut 1. decembari 2015 atorfeqalissaaq.

Lone Nukaaraq Møller Namminersorlutik Oqartussani misilittagaqarluarpoq, ilaatigut Aningaasaqarnermut Naalakkersuisoqarfimmi Meeqqallu pisinnaatitaaffii pillugit sullissivimmi,  MIO-mi,  aqutsisutut atorfeqarsimalluni,  kiisalu Paarisami aamma Ilinniartitaanermut Ilisimatusarnermullu Naalakkersuisoqarfimmi ilisimatusarnermut immikkoortortaqarfimmi ataqatigiissaarisutut atorfeqarsimalluni. Kingullertigut Lone Nukaaraq Møller Peqqissutsimut Naalakkersuisoqarfimmi aggustusi 2015 aallarnerfigalugu pisortaagallarsimavoq.

Lone Nukaaraq Møller Qasigiannguqni inunngorpoq biologitut Nunatsinnilu nappaatit tuniluuttartut ilinniagaqarpoq. Peqqissutsimut Nunanilu Avannarlerni Suleqatigiinnermut Naalakkersuisoq Doris Jakobsen oqarpoq:

"Nuannaarutigeqaara Naalakkersuisut aalajangermata Lone Nukaaraq Møller Peqqissutsimut Naalakkersuisoqarfimmi atorfimmik neqeroorfiginiarlugu. Lone atorfimmiinnissamut qajannaatsumik tunuliaqutaqarpoq, Lonelu Naalakkersuisoqarfimmi pikkorissutut tunniusimasutullu ilisarisimalersimavara. Lonelu suleqatigiinnitta nangeqqinnissaa qilanaarivara.”

Peqqissutsimut Naalakkersuisoqarfimmi  pisortatut atorfimmut aqqanillit qinnuteqarsimapput.

 

Nuuk, ulloq 30. novembari 2015.

Naalakkersuisut Siulittaasuata Naalakkersuisoqarfia