Zinkimik suliniummik innuttaasunik ataatsimiititsinerit naammassisut

Aningaasaqarnermut, Aatsitassanut Nunanullu Allanut Naalakkersuisoq Vittus Qujaukitsoq, Inuussutissarsiornermut, Sulisoqarnermut Niuernermullu Naalakkersuisoq Randi Vestergaard Evaldsen, kiisalu Pinngortitamut, Avatangiisinut Inatsisinillu Atuutsitsinermut Naalakkersuisoq Mala Høy Kúko Ironbarkip Citronen Fjordimi zinkimik aqerlumillu piiaanissamut qinnuteqaataa pillugu innuttaasunik ataatsimiititsinerit sisamaasut Nuummi, Kangerlussuarmi, Sisimiuni Ilulissanilu ingerlanneqareersimalerput.

Australiamiut aatsitassarsiornermut ingerlatseqatigiiffiat Ironbark Zinc Ltd. Nunatta avannaata kangiani Citronen Fjordimi zinkimik aqerlumillu piiaaffeqalerumallutik qinnuteqarput. Piiaaffissamik suliniut suliffinnik 470-it missaannik pilersitsisinnaavoq Nunatsinnilu suliffeqarfiit tunisinissamut periarfissaqassallutik. Piiaaffiup ingerlanerani tamanna akileraarutitigut Nunatsinnut 4-5 mia. koruunit akornannik isertitsissutaasinnaanera ilimagineqarpoq.

Ingerlatseqatigiiffiup avatangiisinut nalunaarusiaa VVM aamma inuiaqatigiit nammassinnaassusaanik naluinaarusiaq VSB decembarip qeqqata tungaanut tusarniutigineqarput. Tusarniutinut akissutit allakkat tamarmik innuttaasunillu tusarniaalluni ataatsimiinnerni apeqqutit oqaaseqaatillu tamarmik kingorna ilisimasanik allattukkatut saqqummiunneqassapput. Suliniutillu akuerineqassanersoq Naalakkersuisunit naliliiffigineqannginnerani nalunaarusiat VVM aamma VSB nutarterneqassapput.

Naalakkersuisunut ilaasortat peqataasut oqarput:

”Suliniut Nunatta aningaasaqaneranut suliffissaqartitsineranullu tapertaalluarsinnaavoq. IBA-mik isuqatiginninniarnissat qilanaarivagut, nunatsinnit suliffissat tunisinissallu sapinngisamik annertunerpaajutinnissaat qulakkeerniassallutigu.

 

Naalakkersuisut suliniut pillugu aalajangiinialerpata pingaartissavaat tamanna avatangiisinut illersorneqarsinnaasumik inerlanneqarsinnaassanersoq. Avatangiisilli pillugit inaarutaasumik aalajangiinnginnermi tusarniaanermut akissutit oqaaseqaatillu, minnerunngitsumillu ilisimatuussutsikkut ilisimasallit arlaannulluunniit attuumassuteqanngitsut DCE-meersut Pinngortitaleriffimmeersullu aatsaat ilanngunneqareerpata aalajangertoqarumaarpoq.

 

Suliniut manna pillugu Qaanaami, Tasiilami Qaqortumilu ukiortaareerpat aamma innuttaasunik ataatsimiititsinissagut qilanaarivagut. Qinnuteqaat pillugu Naalakkersuisut aalajangiinnginneranni ataatsimiinnerni taakkunani apeqqutit oqaaseqaatillugu aamma tusarniutinut akissutitut ilanngunneqassapput, naak ataatsimiititsinerit januaarimi ingerlanneqartussaagaluartut.”

 

 

Paasisaqarnerorusuttut attavigisinnaavaat Naalakkersuisumut allatsi Helene S. Pedersen oqarasuaat +299 58 61 16 imaluunniit e-mail hspe@nanoq.gl.