Naleqqussaanermi suliniutinut nukittortitsissaaq

Ilisimasat nutaat nunatsinni silap pissusianut naleqqussaanermi suliniutinut nukittortitsissaaq

Sapaatit akunneranni kingullermi sammisaqartitsinermi ilisimatusartut silap pissusia pillugu ilisimasanik nutaanik saqqummiussipput. Ilisimasat nutaat nunatta siunissami silap pissusaata allannguutaanut akiuussinnaanerulernissaa anguniarlugu sulianut atorneqassapput.

”Silap pissusaata allannguutaasa sunniutai takusinnaalereerpavut. Immap sikuata siaruarsimassusia annikinnerulerpoq aammalu silarput kiannerulerpoq. Taamatut ingerlaneq ingerlaannassasoq ilisimasat nutaat takutippaat. Siunissami imermi imigassami naasut sinnikui assigisaasalu annertusisinnaapput, kiisalu uumasut kissaatigineqanngitsut amerlisinnaallutik. Taamaattumik akiuussinnaalernissarput pingaaruteqarpoq. Ilisimasat nutaat tamatumunnga ikiussavaatigut. Siunissami silap pissusissaanik ilisimasaqarnermi naleqqussaanerput pitsaanerulersinnaavoq iliuusissallu pisariaqartut isumagisinnaalissavagut”, Pinngortitamut, Avatangiisinut Inatsisinillu Atuutsitsinermut Naalakkersuisoq Mala Høy Kúko oqarpoq.

Sulianut ilisimasallit anorersuarmut akiuupput
Teknikerit, pilersaarusiortut sulianullu ilisimasallit allat sapaatit akunneranni kingullermi anorersuaq akiorlugu siunissami silap pissusia pillugu sammisaqartitsinermut, Danmarkip (aamma Kalaallit Nunaata) Silasiorfiata (DMI) aamma Pinngortitamut, Avatangiisinut Inatsisinillu Atuutsitsinermut Naalakkersuisoqarfiup aaqqissuussaannut peqataapput. Sammisaqartitsinermi DMI-p siunissami silap pissusissaanut ilisimasat nutaat saqqummiuppai, tamatumalu kingorna Pinngortitamut, Avatangiisinut Inatsisinillu Atuutsitsinermut Naalakkersuisoqarfik silap pissusianut naleqqussaanissaq pillugu oqaloqatigiinnissamut qaaqqusivoq.

Ilisimasat nutaat nalunaarusianut arfinilinnut katersorneqarput
Silap pissusia pillugu ilisimasat nutaat qaammatini tulliuttuni tamanit pissarsiarineqarsinnaalissapput, aammalu nalunaarusianut arfinilinnut katersorneqassallutik; Nuna allanngutsaaliugaq, Kommune Kujalleq, Qeqqata Kommunia, Qaasuitsup Kommunia aamma Kommuneqarfik Sermersooq, nalunaarusianut marlunnut avinneqartussaq. Taamaalilluni innuttaasut taamatullu pisortat namminersortullu sullissiveqarfii pilertortumik ilisimasanik, silap pissusianut naleqqussaanermi suliaminnut iluaqutigisinnaasaminnik pissarsisinnaalissapput. Assersuutigalugu ilisimasat nutaat attaveqaatinik ineriartortitsinermut atatillugu atorneqarsinnaapput, taakkununngalu aqqusinernik mittarfinnillu nutaanik sanaartornerit ilaatinneqarput.

Aallaavissaq ataatsimoortoq kissaatigineqarpoq
Sammisaqartitsinermi silap pissusianut silallu pissusianut naleqqussaanermut online-kkut aallaavissamik ataatsimoortumik kissaateqarneq peqataasut saqqummiuppaat. Tamanna pissutigalugu Pinngortitamut, Avatangiisinut Inatsisinillu Atuutsitsinermut Naalakkersuisoqarfik peqataasut kissaataat piviusunngortinniarlugit periarfissanik misissuilluni aallartippoq.

Annertunerusumik paasisaqarusunnermi naalakkersuisup allattaa Elise Uupi Kuitse, +299 34 54 14-imut, e-mail: eukl@nanoq.gl imaluunniit immikkoortortaqarfimmi pisortaagallartoq Karen Anne Arleth, +299 34 54 65-imut, e-mail: knar@nanoq.gl, saaffigineqassapput.