Peqqissutsimut Naalakkersuisoq borgmesterillu isumaqatigiipput

Meeqqat inuusuttullu peqqinnerusariaqarput. Atornerluineq pinaveersaartinneqartariaqarpoq. Ilinniarnissamut inuit tamarmik periarfissaqartariaqarput. Taamatut oqariartuutilimmik Peqqissutsimut Naalakkersuisoq Doris Jakobsen nunatsinni kommunini sisamani borgmesterillu peqataapput Ole Dorph, Hermann Berthelsen, Jørgen Wæver Johansen, kiisalu borgmesterip sinniisussaa siulleq Justus Hansen suliniuteqarnissami siunniussat pillugit nalunaarummik atsiugaqarput.

Suliniuteqarnissami siunniussat pillugit nalunaarut Katuami oktoberimi peqqinnissaq pillugu ataatsimeersuarnerup ineraa, politikerit, atorfillillu assigiinngitsorpassuit, peqatigiiffilerisut allallu innuttaasut peqqissusaat ukkillugu katersuunneranni.

Maanna borgmesterit Peqqissutsimullu Naalakkersuisoq suliffimminnut utissapput anguniakkat pingaarnerit piviusunngortinniassallugit.

-Maanna qanoq iliortariaqarpugut. Meerartavut aallarniutigeriartigit. Meeqqat tamarmik sunngiffimminni sammisassanut peqqinnartunut periarfissaqartariaqarput. Meerartavut allatut ajornaqaaq avatangiisinik pitsaasunik tunisariaqarpavut. Kisianni aamma meeqqat ulluinnarni nalinginnaasunik isumagineqarsimanissaat isumagisariaqarparput soorlu piffissaq eqqorlugu atuariartornissaat aammalu ullaakkut nerisimanissat. Meeqqat inuusuttullu avatangiisinik aalajangersimasunik pisariaqartitsipput politikerit isumaqatigiillutik oqarput.

Innuttaasunik misissuinerup ataatsimeersuarnermilu saqqummiunneqartut inerneri imaannaanngillat. Atornerluineq nunatta kommunini tamani suli ersarissumik ajornartorsiutaavoq. Atornerluinerup ilaqutariit aserortarpai, meeqqallu eqqugaasarput. Kingornuttagaq pitsaanngitsoq kinguaariinni kingornunneqartartoq suli ingerlaarpoq. Tamannalu kingornuttagaq ajortoq kipitittariaqarparput.

Borgmesterit Peqqissutsimullu Naalakkersuisup suliniuteqarnissami siunniussat pillugit nalunaarut atsiugaata siunertaqaraa Innuttaasut peqqissusaat pillugu isumaqatigiissutip pioreersup upernaami 2016-imi nutarternissaa.

Annertunerusumik paasisaqarusukkussi Naalakkersuisup allattaa Rosa Thorsen oqarasuaat +299 553303 / rosat@nanoq.gl attavigineqarsinnaavoq.