Isumaqatigiissummut ilassut nutaaq atsiorneqarpoq

Kalaallit Nunaata EU-llu akornanni aalisarneq pillugu isumaqatigiissummut ilassut nutaaq atsiorneqarpoq

Piffissamut 2016-2020 aalisarneq pillugu isumaqatigiissummut ilassut nutaaq Namminersorlutik Oqartussat tallimanngornermi ulloq 27. november 2015 atsiorpaat. Sinniisoqarfimmi pisortaq Lida Lennert Namminersorlutik Oqartussat sinnerlugit atsiortuuvoq EU-llu Luxemborgimit Siullitaasoqarfimmit Ambassadør Gerge Frieden Danmarkillu Ambassadør Vibeke Pasternak Jørgensen sinniisoralugit.

Lida Lennert oqaaseqarnermini erseqqissaavoq Kalaallit Nunaat EU-lu pitsaasumik peqatigiittut, aalisarnermillu suleqatigiinneq isumaqatigiissutini tamarmiusuni pingaaruteqartumik immikkoortuusoq. Lida Lennert nangilluni erseqqissaavoq: ”Kalaallit Nunaata EU-mik peqateqarneq iluarisimaartorujussuuaa, taannalu Kalaallit Nunaata EU-llu suleqatigiinneranni ataatsimut nalunaarummi naqissuserneqarpoq, tassani aalisarneq pingaaruteqartumik immikkoortuulluni. AAlisarneq pillugu isumaqatigiissummut ilassut ataatsimut isigalugu iluarisimaarnartorujussuuvoq, pisinnataaffinnilu ilisimatuut siunnersuutaasa tunngavigineqarnissaat malinneqarluni, Kalaallillu Nunaanni aalisarnermik inuussutissarsiornerup ineriartorneranut tapersiisoqarnissaa qulakkeerneqaqqilluni.”

Isumaqatigiissummut ilassummi nutaami immikkoortuni arlalinni aalisarnermut piumasaqaatit nutarterneqarput. EU-p aalisarneq pillugu isumaqatigiissummut atuuttumut akiliutaata allanngunnginnissaa isumaqatigiissummi qulakkeerneqarpoq, tamassumalu kinguneranik ukiuni tallimani isumaqatigiissummut ilassutip atuunnerani 674 mio. DKK missaanni Kalaallit Nunaannut akiliutigineqassapput. Akiliutit ukununnga agguarneqarput; aalisarnermi pisassiissutinut akiliutit, aalisariutaatileqatigiiffiit akiliutaat aamma aalisarnermut missingersuutinut tapiissutit.

Annertunerusumik paasisaqarusukkuit, attaveqarfigiuk: Immikkoortortami pisortaq Emanuel Rosing, tlf. 34 50 00, e-mail emanuel@nanoq.gl