Atornerluisunik pingaarnertut katsorsaasartussat 19-it nutaat

Atornerluisuunerup qaangerniarnissaanut ilinniartitaaneq nutaaq piviusunngorpoq. Novembarip 10-ni inuit 19-it Peqqissaanermik Ilinniarfimmi ulluni 10-ni pikkorissarnermik ingerlatsereerlutik atornerluisut pingaarnertut attaviinik ilinniartitsisut naammassipput. Peqqissutsimut Naalakkersuisoqarfiup aamma Peqqissaanermik Ilinniarfiup ilinniarneq suliarisimavaat.

2016-imut aningaasanut inatsisip tallimanngornermi novembarip 20-ani akuersissutigi-neqarneratigut Atornerluisuunermut Pilersaarut aningaasalersorneqarsinnaalerpoq. Atornerluisunik pingaarnertut attaviinik ilinniarneq nuna tamakkerlugu atornerlui-suunermut pilersaarummi nutaami ilinniartitaanerit pillugit suliniuteqarnermut ilaavoq. Pilersaarummut ilaasumik ukiut pingasut tulliuttut ingerlaneranni kommunini tamani atornerluisuunerup akiorniarnissaanut sullissivinnik pilersitsisoqarniarpoq.

Inuk qitiusutut katsorsaasartussaq tassaavoq illoqarfimmi najugaqarluni inunnik atorner-luisunik ikiuisartussaq. Ilinniarneq ilaatigut peqqinnissaqarfimmi, kommunini ilinniarfin-nilu sulisunut sammititaavoq.

Inuk qitiulluni sulisussaq atornerluinernik assigiinngitsunik takusaqarsinnaanermik ilin-niartitaavoq, soorlu hashimik, imigassamik aningaasanoornermillu atornerluisuunermik. Inuk qitiulluni sulisussaq aamma inuit atornerluisut katsorsartinnissaannik kajumissuse-qalersitsiniassalluni sungiusagaavoq. Inuup katsorsaariaatsinut ilisimasaqarluarnermigut inummut ilitsersuisussatut atuussinnaavoq.

- ”Atornerluisuuneq inuttut peqqissuunissatsinnut ajornartorsiutaanerpaajuvoq. Taamaammat Inatsisartut aningaasanik pisariaqartinneqartunik immikkoortitsinermikkut atornerluisuunermut pilersaarummut tapersersuimmata nuannaarutigeqaara. Tamanna siumut alloriarneruvoq annertooq, ukuinimi tulliuttuni kommunini tamani atornerluisunut sullissivinnik peqalertussaassaagut," taama oqarpoq Peqqissutsimut Naalakkersuisoq Doris Jakobsen nangillunilu:

- ”Atornerluisuunermut pilersaarut ilinniartitaanikkut suliniuteqarluarnikkut aatsaat piviu-sunngortinneqarsinnaavoq. Taamaammallu atornerluisunut pingaarnertut attaviinik ilinniakkamik naammassinninnerannik pilluaqqussavakka. Suliassamik pingaaruteqarluinnartumik suliaqarniarlutik angersimapput, nalorngisiginngilaralu taakkua suliniuteqarnermikkut inuppassuit atornerluisuunermik inuuneqaratik inuulernissaannut ikiorsinnaajumaaraat.”

Atornerluisunut Pingaarnertut Attaviinik ilinniarneq tulliani 2016-imi sapaatip akunnerit tallimaanni arferngannilu neqeroorutaassaaq. Tamatuma kingorna atornerluisunut pingaarnertut attaviinik ilinniagallit massakkullu katsorsaasartut atornerluisuunerup akiorniarnissaanut allatut ilinniagaqarsimasut kalaallisut ilinniartitaaneq aqqutigalugu atornerluisunut katsorsaasutut ilinniarnermik nangitsisinnaalerput.

Atornerluisunut pingaarnertut attaviinik ilinniarneq paasisaqarfiginerusinnaavat Peqqissaanermik Ilinniarfiup nittartagaanut www.pi.gl-imut isernikkut.

Annertunerusumik paasisaqartoqarniarpat Naalakkersuisup allattaa Rosa Thorsen oqarasuaatikkut +299 55 33 03 imaluunniit e-mail rosat@nanoq.gl-ikkut attavigineqarsinnaavoq.