Namminersorlutik Oqartussat NunaMineralsimik piginneqataajunnaartut

2015-imi januaarimili isumaqatigiinniareerlutik Naalakkersuisut NunaMineralsilu aamma Greenland Mining Management-ilu, GMM, ulloq 25. novembari 2015 isumaqatigiissuteqarput Namminersorlutik Oqartussat  NunaMineralsimik piginneqataassutaannik taarsigassarsititsisimanerallu GMM-ip tigussagai.

Isumaqatigiissut tamanna NunaMineralsimi ukiumoortumik ataatsimeersuarnermik maanna malitseqartinneqarpoq.

Isumaqatigiissutip Namminersorlutik Oqartussanut sunniutissai tassaapput, NunaMinerlasip aningaasarliorneranit ikiorserniarlugu Naalakkersuisuugallartut Aningaasaqarnermullu Ataatsimiititaliap 2014-imi decembarimi ikiorsiisariaqarsimanerannit taarsigassarsiat  4,5 mio. koruunit GMM-ip akilertussanngussammagit. Taamaalilluni taarsigassarsiat akilerneqartutut Naalakkersuisunit isigineqarsinnaalerput Landskarsilu NunaMineralsimut ikiorsiisimanermit annaasaqaateqarani.

Ilanngullugu GMM-ip Namminersorlutik Oqartussat NunaMIneralsimi piginneqataassutai pisiarai, taamaalilluni Namminersorlutik Oqartussanit selskabimi piginneqataajunnaarluni. NunaMineralsimik aqutsineq taamaalilluni GMM-imit tiguneqassaaq.

Illuatungeriit  isumaqatigiissutissatut  isumaqatigiinniarnerat iluamik aallartippoq NunaMinerals 15. maaji 2015 akiliisinnaajunaarmat. Isumaqatigiissutip inernera, NunaMineralsimi pissutsit selskabillu ataannarnissaanut pilersaasusiornissamik pisariaqartinneqartut pillugit piviusorsiortumik isiginnilluni sivisuumik sulinermik tunngaveqartoq, Naalakkersuisut naammagisimaarpaat.

NunaMineralsip ataannarnissaanik Naalakkersuisut qulakkeeriniarneranni Inatsisartut Aningaasaqarnermut Akileraartarnermullu Ataatsimiititaliap tapersersuisimanera Naalakkersuisut nuannaarutigaat.

Isumaqatigiissummi GMM-imut piumasaqaatit inissitassallu piareerpata aatsaat isumaqatigiissut atuutilissaaq. Januaarip aallartinnerani 2016-imi piariissangatinneqarput.

 

Paasisaqarnerorusuttut attavigisinnaavaat Naalakkersuisoqarfimmi pisortaq Søren Hald Møller, oqarasuaat +299 34 50 00 imaluunniit e-mail sham@nanoq.gl.