2016-imut aalisagartassiissutit

Fiskefartoej

Naalakkersuisut aalisakkanut assigiinngitsunut aappaagumut pisassiissutit ippassaq, novembarip 24-anni aalajangerpaat

Qalerallit
Naalakkersuisut aalajangerput aqutsiveqarfinnut Upernavimmut, Uummannamut aamma Qeqertarsuup Tunuanut 2016-imut qaleralittassiissutit ukioq mannatut amerlatigisut pisassiissutigineqassasut.

9.500 tonsit aqutsiveqarfinnut Upernavimmut aamma Uummannamut qaleralittassiissutigineqarput, 9.200 tonsit aqutsiveqarfik Qeqertarsuup Tunuanut.
Immikkut 100 tonsinik sumiiffinni tamani qaleralittassiisoqarpoq, taakku saniatigooralugu aalisartunit aalisarneqarsinnaassapput tunitsivinni qullukkiarineqassallutik.

Saarulliit
Naalakkersuisut aalajangerpaat 2015-imisulli 25.000 tonsinik sinerissap qanittuani saarullittassiisoqassasoq. Amerlassusiliinermi saarullinniarnerup qularnaatsumik ingerlaannarnissaa suliffeqarniarnerlu tunngavigineqarput, saarulliit tamarmik nunamut tulaanneqartussaallutik. Saarulliit 12.379 tonsit pisarineqarsinnaasutut innersuussutaapput.
Ilanngullugu aalajangerneqarpoq saniatigooralugu aalisartut saarullinnik 1.000 tonsinik aalisakkaminnik tunisaqarsinnaassasut.

Tunumut nunattalu kujataanut saarullittassiissutit 16.000 tonsiupput, ukioq maannamut sanilliullugit 2.000 tonsinik ikinnerullutik. Ikileriarnerinut pissutaavoq 2015-imi saarulleqassutsimik misissuinerup takutimmagu, tamaani saarulliit ikileriartulaartut.

Kitaata avataani saarullinnik misileraalluni aalisarnissamut pisassiissutigineqartussat aatsaat aalajangersaavigineqassapput ukioq manna aalisarneq nalilersuiffigineqareerpat. Ingerlatsiviit aalisarnermut peqataasimasut aalisarnertik pillugu nalilersukkatik Aalisarnermut, Piniarnermut Nunalerinermullu Naalakkersuisoqarfimmut nassiutissavaat. Naatsorsuutigineqarpoq Naalakkersuisut ukioq manna aalajangissagaat kitaani misileraalluni saarullinniarnissaq qaqugu piumaartoq.

Aalisakkat allat pisassiissutigineqarneri uani takukkit

Attavigineqarsinnaavoq Aalisarnermut, Piniarnermut Nunalerinermullu Naalakkersuisoqarfimmi allaffimmi pisortaq, Jóhanna Lava Køtlum. Mail: jool@nanoq.gl