Inuusuttut suliffissaaleqinerat annikillisinniarlugu iliuuserisaq pinnguaatigineqassanngilaq

KNR-ikkut Naaja Nathanielsenip oqaatigaa IA-p Piareersarfinnit koruunit 5 mio.-t arsaarinnissutiglaugit ilaatigut højskolinut sulianullu assingusunut allanut tunniunniaraat.

Koruunit 8 mio.-it piumasaqaatigineqaraluarput. Naalakkersuisut koruunit 3 mio.-it tunniuppaat, aningaasanulli inatsisissap arlalinnit isumaqatigiissutigineqartup koruunit 5 mio.-it uniffigerpasippaat, Naaja Nathanielsen naapertorlugu.

Tassunga tunngatillugu Inuussutissarsiornermut, Suliffeqarnermut Niuernermullu Naalakkersuisoq, Randi Vestergaard Evaldsen oqarpoq:

"Ullumikkut KNR-ikkut Naaja Nathanielsenip saqqummiuppaa IA-p aningaasanut inatsimmik atsiuisinnaanissaanut tunngavigisassatut Piareersarfinnit koruunit 5 mio.-it nuutsinnissaannik piumasaqaat.

Suliffeqartitsinermik pilersaarummi ”Suliffissaqartitsineq Toqqissisimanartoq”-mi ingerlatani pingaarnerpaat ilagaat nunatsinni inuusuttut akornanni suliffissaaleqinerup annertuup akiornissaa. Taamaattumik nunami tamarmi Piareersarfiit ilassutinik 250-inik tigusaqarsinnaalerput, ilaatigut inuusuttunut suliffeqarfiusumut attuumassuteqannginnerpaanut sannavinni ingerlassanut allatigullu atuagarsornertaqanngitsunik neqeroorutinut atorneqassasunik. Iliuuserisaq isumaga malillugu assupilussuaq pingaaruteqartuuvoq.

Aningaasat Naaja Nathanielsenip ”annikittunnguaaneragai” najukkani Piareersarfinnut, inuusuttunik ilisarisimannittunut immikkoortitaasut inuusuttut akornanni nuannarineqartuupput, pitsaasunimllu inerneqartitsisutut uppernarsaatissartaqarlutik.

Inuusuttunit suliffissaaleqisunit iliuuserisamit Naaja Nathanielsen aningaasanik arsaarinninniarpoq, taakkulu inuusuttunik atuagarsornikkut sanngiiffeqartunik ilinniagaqalersitsisinnaanerminnik uppernarsaatissaqanngilluinnartunut suussusersineqanngivissunut namminersuutigisatut isumaginninnikkut pilersitanut, højskolinut assigisaannullu tunniunniarpai. Tamatuma isumassarsialatsiaannginnera isumaqarfigaara. Inuusuttut siunissaat pinnguaatigalugu misileraaffigissanngilarput. Atuussinnaasoq, meeqqat atuarfiata ilinniagaqalernerullu akornanni aqqutissiuussisinnaasoq ingerlateqqissavarput.

Siusinnerusukkut oqarpunga, uteqqikkusupparalu IA-p siunertarisaa naapikkusullugu, PKU-milu kontomi pikkorissartitsinernut koruunit 3 mio.-t inuusuttunut neqeroorutinut suli amerlanerusunut nuukkusullugit. Aningaasalli iliuutsinit uppernarsarneqarsinnaasutut kinguneqartitsisartuusunit tamaviaavilluni arsaarinnissutaanissaasa tulluartuunera takusinnaanngilara”.

 

Annertunermik paasissutissarsioruit attavigiuk naalakkersuisumut allatsi Helene S. Pedersen, oqarasuaammi angallattakkami 58 61 16-imi, imaluunniit e-mailikkut: hspe@nanoq.gl