Qitiusumik Siunnersuisarfik Saaffik

Qitiusumik Siunnersuisarfik/Saaffik meeqqat inuusuttuaqqallu atuinerluttunngorsinnaanerat anniartinneqartarnerallu pinaveersaartinniarlugit iliuuseqaatinut aningaasaliissuteqarniarpoq

Illoqarfippaalunni nunaqarfinnilumi iliuuseqaatissanut qaammarsaaniarnissanullu aningaasaliisoqarsimavoq. Siunertarineqarpoq meeqqat inuusuttullu atuipiluttunngorsinnaanerisa anniartitsisarnerisalu pinaveersaartinneqarnissaanut iliuuseqaateqartoqartarnissaa.

Tamatumani assersuutigalugu innuttaasunik ataatsimiittitsisarnerit radiukkullu tusaqqusaarutit aqqutigalugit meeqqat inuusuttuaqqallu atuipiluttunngorsinnaanerinut anniartitsisarnernillu nungusaaniarluni qanoq iliuuseqartarnissanut aningaasaliisoqarluni.

Tamanna pissaaq iluatsillugu Women’s Word Summit Foundation/Silarsuarmi Arnat Isumasioqatigiittarfiattut Aningaasaateqarfiannit (WWSF-imit) ulloq 19. novembarip nunarsuarmi tamarmi ulloritinneqarneranut atatillugu. WWSF kikkunnulluunniit pituttorsimanani soqutigisaqaqatigiiffiuvoq, arnat meeqqallu pitsaanerusumik atugaqalernissaanik sulissutiginnittartoq aammalu Naalagaaffiit Peqatigiinnut siunnersuisartuusoq.
Ilaqutariinnermut, Naligiissitaanermut Isumaginninnermullu Naalakkersuisoq Martha Lund Olsen, tamanna pillugu imak oqaaseqarpoq: "Meeqqanik inuusuttuaqqanillu atornerluisarneq anniartitsisarnerlu unammilligassaavoq Naalakkersuisunit sukumiisorujussuarmik sulissuteqarfigineqartoq. Taamaattumik ulloq 19. november nalliussiniarparput naqissusiiviginiarlugu meeqqanik inuusuttuaqqanillu atornerluillunilu anniartitsisarneq akuerineqarsinnaanngimmat."

Qitiusumik Siunnersuisarfik/Saaffik Ilaqutariinnermut, Naligiissitaanermut Isumaginninnermullu Naalakkersuisoqarfiup ataani inissisimasup, ulloq taanna suliniutinut assigiinngitsunut aningaasaliissuteqarsimavoq. Kommunit tunuliaqutaralugit aaqqissuussiniartut ulloq taanna qanoq iliuuseqaateqarniarlutik pilersaaruteqartut qinnuteqaateqarsinnaasimapput.


Sukumiinersumik paasisaqarniaruit Naalakkersuisup Martha Lund Olsen-ip allattaa Sina Møller Kristiansen oqarasuaat 53 93 71 imal. email: nimk@nanoq.gl aqqutigalugit attaveqarsinnaavutit.