Kujataani ilinniarnissamut periarfissat nukittorsarneqarput

Namminersorlutik Oqartussat ulluni makkunani Qaqortumi Campus Kujallermi alliliinernik iluarsaassinernillu, ilinniarnertuunngorniarfimmi ilinniartut tiguneqartartut amerlisinniarlugit, kiisalu inini ilinniartitsiviusuni pissutsinik naleqquttunik pilersitsiniarluni, ilinniarfiup siunertaanut avatangiisitigut sinaakkutissanik qulakkeerisussanik aallartitsissaaq.

Ineqarnermut, Sanaartornermut Attaveqaqatigiinnermullu Naalakkersuisoq Knud Kristiansen oqarpoq:
”Ilinniarnertuunngorniarfik pioreersoq annertuumik iluarsaanneqassaaq, aammalu 2.075 m2-nik annertussusilimmik ilaneqassalluni. Aaqqiissutissami ilinniarfik tallimanik tamakkiisunik aqqutissaqarfiusoq katillugit 3.975 m2-nik annertussuseqassaaq, ilinniartunut 500-nut inissaqartitsissalluni.”

Ilinniarnertuunngorniarfiup pioreersup silataa nutaarluinnarmik ilusiligaanermigullu nukittuumik isikkoqalissaaq, Skolevej sinerlugu Tasersuup Atuarfiata iluarsaanneqaqqammersup akini nunami kusanarluni inississimassalluni.
Ilinniarfiup iluani ilinniartitsinermi avatangiisit peqqinnartuunissaat pissarsiaqarfiunissaallu qulakkeerniarlugu silaannarissarfiit akisuasarnerillu pitsaassutsinut atuuttunut qaffatsinneqassapput.

Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoq Nivi Olsen oqarpoq:
”Ilinniarfiup ilassutaani init ilinniartitsiviit nutaat arfinillit aamma init ilinniagassanut aalajangersimasunut atugassat nutaat arfinillit inersuarmut allisamut atasunngorlugit sananeqassapput. Inersuaq ulluinnarni ilinniarfimmi qitiusoqarfittut nutaatut atorneqassaaq, tassanilu ilinniartunut sutorniartarfik isersimaartarfiillu, ataatsimoorluni sulinissamut, ilinniagassat akimorlugit ilinniartitsinissamut isersimaarnissamullu inissaqartitsiviusut ulluinnarni ilinniarnermi avatangiisit pitsaanerulernissaannut periarfissiissapput.”

Sanaartukkap 2018-ip aallartinnerani naammassinissaa atorneqalernissaa naatsorsuutigineqarpoq.

Sukumiinerusumik oqaaseqartitsisoqarusuttoqartillugu saaffissat:

Naalakkersuisup allattaa Jensine Berthelsen tlf. 562303 imlt. mailikkut jebe@nanoq.gl  
Naalakkersuisup allattaa Jens Frederik Nielsen tlf. 345702 imlt. mailikkut jfni@nanoq.gl