Isumaqatiginninniarnernut peqataanissara pisussaaffiginngilara

Inatsisartuni ilaasortaq Ane Hansen, Inuit Ataqatigiit, facebookimini ippassaq novembarip 17-ianni arlalinnik apeqqutilliivoq qalerallit avaleraasartuullu avataasiorluni aalisarnermi pisarineqartut akitsuutaat pillugit Inatsisartut inatsisaata allanngortinneqarnissaa pillugu Inatsisartuni oqaluuserineqareersorlu.

Ane Hansenip Aningaasaqarnermut Aatsitassanullu Naalakkersuisoq, Vittus Qujaukitsoq, Inatsisartut oqaluttarfiannit siunnersuummik saqqummiussisoq assilisimavaa.

Assiliaq ima oqaasertalerlugu: Aalisartut 20 million koruuninik akileraarutaasa ilaniarneqalermata naak illersissaaat ? Aalisarnermut Naalakkersuisoq ? Naalakkersuisut siulittaasuat ? Immaqa akitsuusiisoqannginnerani aalisariarput qaammammulerlutik. Qaammammut aningaasarsiaqarlutik.

Isumaqarpunga Naalakkersuisunik saqqummiussinerit tupinnarlunilu imaannaanngitsoq, Inatsisartut siulittaasoqarfianni ilaasortaagavit, siulittaasup tulliata pingajuugavit.
Nammineerlunga ataatsimeeqataanngilanga aalisarnermut aningaasaliissutinut immikkoortitat pillugit Inatsisartut inatsisaata allanngortinnissaa pillugu, Inatsiartunut novembarip 19-ianni saqqummiunneqartussaq piareersarlugu suliaqarama.

Oqaatigisannut tupigusulluinnarpunga, oqarsinnaagavit qaammammut aningaasarsialerluta aalisariarsinnaasimagatta. Naalakkersuisunut tunngavissaqanngitsumik isiginerlutitsilerlutit.

Naqissuserlugu erseqqissarusuppara isumaqatiginninniarnernut peqataanissara pisussaaffiginnginnakku Aningaasaqarnermut Aatsitassanullu Naalakkersuisoq, Vittus Qujaukitsoq, siunnersuummut akisussaasuummat.

Aamma erseqqissarusuppara Naalakkersuisoqarfimmi suliassannik suliassaqartinnanga Inatsisartut ataatsimiittarfianni ataatsimeeqataasarama.

Ilisimatissavagit Naalakkersuisuni siulittaasoq Dronning Ingridip napparsimavissuani suliaritinnini pissutigalugu ataatsimeeqataanngimmat.

Inussiarnersumik inuulluaqqusillunga

Karl-Kristian Kruse
Aalisarnermut, Piniarnermut Nunalerinermullu Naalakkersuisoq