Tusagassiorfinnut tapiissutit pillugit oqaaseqaat

Sermitsiaq.AG-mut tapiissutit pillugit AG-mi ullumi allaaserisanut oqaaseqaat

AG-mi allaaserisani marlunni pingaarnertullu allaaserisami ullumi oqaatigineqarpoq nutaarsiassaqartitsivimmut Sermitsiaq.AG-mut tapiissutinik Naalakkersuisut 2014-imi akiliiniaratik aalajangernerisa inatsinik malinninnera pillugu Naalakkersuisut Siulittaasuata Naalakkersuisoqarfiani sulinermi allakkiamik aaqqissusioqarfimmi tigummiaqarlutik.

Tamatumunnga oqaaseqaateqarniarpunga politikkimut tunngasuunngitsumik, kisiannili Naalakkersuisut Siulittaasuata Naalakkersuisoqarfiata iluani qarasaasiakkut allakkiap aviisimi allaaserineqarsimaneranut tunngassuteqartumik.

Siullermik ileqqorissaarumallungalu: Inatsiseqarnermut Immikkoortortami inatsisitigut naliliinermi oqaaseqaatigineqartut, isumaliutersuutigineqartut inerniliunneqartullu pitsaassusaasa apeqqusersornissaannut tunngavissaqanngilanga. Taamaammat Inatsiseqarnermut Immikkoortortap naliliisimaneranut aaqqissuisoqarfiup iluarinninngitsumik naliliinera isumaqatiginngilara.

Ilanngullugu isumaqarpunga Naalakkersuisoqarfimmi allakkiami killeqanngitsumik iluarisamillu allattoqarsinnaanera pissusissamisoorpoq. Taamaaliornerup allakkiami isumaliutersuutit inerniliussallu ajornerulersinngilai.

Allatut oqaatigalugu pisortani allaffissornermi allanilumi killeqanngitsumik namminerlu periusini atorlugu attaveqartoqarsinnaasariaqarpoq. Tamanna Pisortani Sulinermi Malittarisassani pingaarutilimmik tunngaviunera Danmarkimi pisortani sulineq pillugu isumalioqatigiissitami nassuiarneqarpoq:

Piareersaataasunik isumaliutersuutit saqqummiunneqaratarsinnaanerannik tatisimaneqarani, ataqatigiit akornanni sulinermi aalajangiinerit qanoq ingerlasimanerat pillugit allakkiat kiisalu pisortani sulisut killeqanngitsumik ilusileriigaanngitsumillu isumaliutersorlutillu suliaminnik piareersaasinnaanissaat siunertaralugu saqqummiunneqarsinnaanissaannut illersorneqarput.

Allakkiaq pineqartoq takujumallugu AG-p qinnuteqaataa Naalakkersuisut Siulittaasuata Naalakkersuisoqarfianit itigartitsissutigineqarpoq Pisortani Sulinermi Malittarisassat maleqqissaarlugit. Taamaammat ataqqineqartariaqarpoq sulisut immikkoortortaqarfiilluunniit ataasiakkaat tusagassiorfinni taamannak nittarsaanneqannginnissaat, aali sulisut iluamik peqqissaartumillu sulisimasut.

Taamaammat ajuusaareqaara sulisut ataqatigiit akornanni allakkiat avammut saqqummiunneqannginnissaat taamalu tamanut oqallisissianngortinneqannginnissaat pillugu tunngavik atuutsissinnaasimannginnatsigu.

Aviisimi allaaserisanut annertunerusumik ilanngussassaqanngilanga. Sermitsiaq.AG-mut tapiissutit pillugu Naalakkersuisunut §37 naapertorlugu siorna apeqqutit akissutaanni suliap ingerlarnga pillugu nassuiaasoqareerpoq.

 

Søren Hald Møller