Siunissami silap pissusaa

Ukiut 5-it, 35-it aamma 85-it qaangiuppata illoqarfinni imaluunniit nunaqarfinni silap pissusaa qanoq isikkoqassava? Siunissami Kalaallit Nunaanni silap pissusaa pillugu ilisimasat nutaat Danmarkip (aamma Kalaallit Nunaata) Silasiorfiata (DMI) Namminersorlutik Oqartussat peqatigalugit saqqummersippaat.

Silap pissusaata allanngoriartornerata sunniuteqarnera misigisalereerparput. Piffissaq naasoqarfiusartoq sivisunerulersimavoq, piffissat aputeqarfiusartut sivikinnerulerlutik, siku saannerulerluni aammalu nuna qeriuaannartoq panerluni. Taakkua tamarmik uagutsinnut sunniuteqarput, aammalu unammilligassaqartitsilerlutik periarfissaqartitsilerlutillu. Kisianni siunissami silap pissusaanut suummita naatsorsuutigisinnaassavagut?

Siunissami silap pissusaa pillugu ilisimasat pitsaanerulernerat
Tamanna paasiniarlugu Danmarkip silasiorfia (DMI) aamma Pinngortitamut, Avatangiisinut Inatsisinillu Atuutsitsinermut Naalakkersuisoqarfik suleqatigiissimapput. Paasisat teknikerinut, pilersaarusiortartunut allanullu suliaqartunut arlalinnut Nuummi ulloq 20. november suliaqarluni ataatsimiinnermi saqqummiunneqassapput. Ilisimasat nutaat taakkua, assersuutigalugu attaveqarnermi aningaasaliinissat imaluunniit nunalerinerup iluani suliniutit nutaat pillugit ungasissumut pilersaarutinik suliaqartoqartussanngortillugu, qanoq iliorluni sapinngisamik pitsaanerpaamik atorneqarsinnaanersut qimerloornissaa siunertaavoq. Suliaqarluni ataatsimiinnermi DMI-ip silap pissusaani ilisimasat nutaat saqqummiutissavai, aammalu Pinngortitamut, Avatangiisinut Inatsisinillu Atuutsitsinermut Naalakkersuisoqarfik silap pissusaanut naleqqussarnissaq pillugu oqaloqatigiinnissamut qaaqqusissalluni.

Suliaqarluni ataatsimiinnissamut atatillugu Pinngortitamut, Avatangiisinut Inatsisinillu Atuutsitsinermut Naalakkersuisoq Mala Høy Kúko oqarpoq: ”Kalaallit Nunaanni siunissami silap pissusaani naatsorsuutigineqarsinnaasut taama sukumiitigisumik takutillugu saqqummiisinnaanerput aatsaat siullermeertumik pivoq. Paasissutissat nalunaarsukkat nutaat atorlugit, nammineq illoqarfigisami qanoq kiatsigissanersoq, aammalu qanoq sivisutigisumik aputeqartarnissaa naatsorsuutigineqarnersoq, takuneqarsinnaapput. Tamatuma kingunerisaanik assersuutigalugu Kalaallit Nunaata kujataani sumiiffinni ataasiakkaani silap pissusaa qanoq ilissanersoq takorloorsinnaanerulissavarput, aammalu inuussutissarsiutinik ineriartortitsinermut tunngatillugu isumaliutersuutitsinni ilaatissinnaassallugu”.

Silap pissusaa pillugu aaqqissuussineq Kalaallit Nunaat tamaat ingerlanneqassaaq

Tamatuma saniatigut DMI aamma Pinngortitamut, Avatangiisinut Inatsisinillu Atuutsitsinermut Naalakkersuisoqarfik ulloq 19. november nal. 19:30 – 21:00 Katuami ammasumik aaqqissuussinermut qaaqqusipput. Tassani DMI taamatuttaaq siunissami silap pissusaa pillugu oqaluttuassaaq. Siunissami qanoq kiatsigilissava? Qanoq siallertartigissava apisartigissavalu? Qanoq sivisutigisumik aputeqartassava? Aammalu tamanna unammilligassanik periarfissanillu sunik nassataqassava?

”Aaliangiupparput kikkut tamarmik internettikkut attaveqaatillit

periarfissinniarlugit ulloq 19. november ingerlatassatsinnut malinnaanissaanut. Neriuppunga nunatsinni innuttaasut amerlasuut atorluassagaat”, oqarpoq Pinngortitamut, Avatangiisinut Inatsisinillu Atuutsitsinermut Naalakkersuisoq Mala Høy Kúko.

Aaqqissuussinermut malinnaarusussagaanni link-imi matumani paasissutissat annertunerusut nassaarineqarsinnaapput: http://digitalimik.gl/da/Nyheder/2015/10/Klima-arrangement   

 

Paasissutissanik annertunerusunik piniarnermi attaveqarfigineqassaaq Naalakkersuisup allattaa Elise Uupi Kuitse, +299 34 54 14, e-mail: eukl@nanoq.gl imaluunniit Immikkoortortaqarfimmi pisortaagallartoq Karen Anne Arleth, +299 34 54 65, e-mail: knar@nanoq.gl