Tapersersortit

“Kommune Kujallermi innuttaasunut innarluutilinnut tapersersortit 13-t, novembarip ulluisa 13-anni tapersersortit, meeqqanik, inuusuttunik inersimasunillu annertuumik innarluutilinnik sullitaqartuusut pikkorissartinneqarnerminni naammassinnissimanerminnut uppernarsaatissatik tiguaat.

Pikkorissarsimanermut uppernarsaatinik tunniussineq Hotel Qaqortoq-mi pivoq.

Tapersersortinik pikkorissaaneq arfinilinnik immikkoortortaqarpoq katillugu ulluni 29-ni ingerlasarluni. Tamatumani pikkorissaatigineqartut sunguisaatigineqartullu peqataasut ulluinnarni suliaannik aallaaveqartuupput. Pingaarnertut anguniagaalluni - ulluinnarni sulinermi sakkussamittut - namminneq piginnaasaqarfimminnik ilisimaarisaqarlualernissaat.

Peqataasut ilaatigut,nalinginnaasumik ineriartorneq pillugu tarnip pissusaanut tunngasumik aamma innarluutinik assigiinngitsunik tunngasunik ilisimasaqalernissaat anguniagaavoq, tassuunakkut innarluutilinnik isumaginninnissamut sakkussaqalerluarsikkumallugit. Aammattaaq perorsaanermi isiginneriaatsit aammalu immikkut ittut, attaveqarnikkullu piginnaasaqarneq ilaatigut sammineqarlutik. Taamattaaq isumaqatigiinnginnernik, paasinninneq aamma qaangiiniarsinnaaneq kiisalu suleqatinik, assingusunik suliaqartunik allanik aamma angajoqqaanik suleqateqarneq sammineqarlutik.

Tapersersortinik pikkorissaatitsineq pingaarnertut ilinniarsimanngitsunut sammititaavoq, kiisalu Innarluutit Pillugit Ilisimasaqarfiup Siunnersuisarfiutigisup Ilaqutariinnermut Naligiissitaanermut Isumaginninnermullu Naalakkersuisoqarfimmiittup Ilulissanilu Perorsaanermik Ilinniarfiup akornanni suleqatigiinnikkut aaqqissugaalluni.

Paasisaqarnerorusuttut attavigisinnaavaat Karen Joelsen Kristensen IPIS-mi pisortaagallartoq, oqa. 34 66 24 mail karj@nanoq.gl