Qujanaq pillugu unammisitsinermi ajugaasut

Kitsissuarsunni Ole Reimerip Atuarfia 2015-imi Qujanaq pillugu unammisitsinermi ajugaasuuvoq

Qujanaq – unammisitsineq matumani facebook-ikkut septembarip qiteqqunneranili aallartimmat, sapaatit akunneri tamaasa nunatsinnit tamanit inuit qanoq ililluta Kalaallit Nunaat pitsaanerusumik paarisinnaaneripput pillugu siunnersuutinik pitsaasunik, nuannersunik pilersitsiviusinnaasunillu nassiussisarsimapput. Naalakkersuisut Qujanamut peqataasimasut tamarmik qutsaviginiarpai.
Ullumi tusagassiortunik katersortitsinermi Pinngortitamut, Avatangiisinut Inatsisinillu Atuutsitsinermut Naalakkersuisup Mala Høy Kúko-p kiisami Qujanaq pillugu unammisitsinermi eqqugassamik pingaarnermik eqquisoq pissanngataaqisoq saqqummiuppaa. 10.000 koruuninik eqquisoq tassaavoq Kitsissuarsunni Ole Reimerip Atuarfia.

Atuarfimmi atuartut ilinniartitsisullu ulloq ataaseq atorlugu Kitsissuarsunni eqqakkanik katersuisimapput. Katersuingaatsiarsimapput, taakkulu aamma videomi assini, Inger Jeremiassenip nassiussimasaani takuneqarsinnaapput.

”Eqqugassamik annermik eqquiniarnermi siunnersuutit pitsaalluinnartut tiguneqarput. Kisianni Ole Reimerip Atuarfia ajugaatipparput, atuarfiup Kitsissuarsunni eqqakkanik katersuinermi suliniutai Qujanaq pillugu oqariartuutip aallaavianik eqquisuummata. Nuannaarutigaara meeqqat inuusuttullu nunarput taama paarilluartigigaat takugakku. Ole Reimerip Atuarfia ajugaanerani pilluaqqorujussuarpara!”, Mala Høy Kúko oqarpoq.

Annertunerusumik paasisaqarusunnermi naalakkersuisoqarfimmi pisortaq Mette Skarregaard Pedersen (+299) 529844-imut attaveqarfigineqassaaq.