Peqqissaasunngornianut ilinniarfiusinnaalissaaq

Peruluttunut immikkoortortaqarfik peqqissaasunngornianut ilinniarfiusinnaalissaaq

Qallunaat Nunaanni Sundhedsstyrelsip – Viborgimi nunap immikkoortuani qitiusumik napparsimmaviup Kalaallit Nunaannilu Dronning Ingridp Napparsimmavissuata akornanni peruluttunik peqqissaanermik immikkut ilisimasalinnik ilinniartitaasinnaanermut isumaqatigiissut novembarip aallaqqaataani piviusunngorpoq. Isumaqatigiissut peruluttunik peqqissaanermik immikkut ilisimasalinnik imminut pilersorsinnaanerulernissamut alloriarneruvoq pingaarutilik.

Dronning Ingridip Napparsimmavissuani peruluttunut immikkoortortaqarfik, 2016-imi januaarip aalaqqaataaniit ukiuni marlunni misiliutaasumik peqqissaasunut peruluttunik peqqissaanermik immikkut ilisimasalinngornianut ilinniarfinngussaaq.
Qujanartumik Viborgimi nunap immikkoortuani qitiusumik napparsimmavimmi isumaqatigiissuteqarnikkut- suullu tamarmik pilersaarutaasutut ingerlassappata- peqqinnissaqarfik ukiualuit ingerlaneranni peruluttunik peqqissaanermik immikkut ilisimasalinnik imminut pilersorsinnaanerulissaaq.

Inerisaaneq aalaakkaasunillu sulisoqarneq pingaarnerutillugit
Dronning Ingridip Napparsimmavissani peruluttunik peqqissaanermik immikkut ilisimasalinnik sulisoqarniarnikkut unammilligassaqarneq pissutaalluni suliniut aallarnerneqarpoq. Ullumikkut immikkut piginnaasat Qallunaat Nunaanniit pissarsiarineqartarput. Piginnaasat Kalaallit Nunaanniiginnarnissaat anguniagassatut siunniussaavoq.

Peqqissutsimut Naalakkersuisoq Doris Jakobsen ima oqaaseqaateqarpoq:
- Qallunaat Nunaanni Sundhedstyrelsip – Jyllandip qeqqani nunap immikkoortuata Kalaallit Nunaannilu Peqqinnissaqarfiup isumaqatigiissuteqarsimanerat nuannaarutigaara. Uagut nammineq sulisutta ilinniartitaajuarnissaat piginnaasatigullu qaffassarneqartuarnissaat pingaaruteqarpoq. Sinerissami napparsimmaviit suliffigissallugit kajungernartuussapput sulisullu piginnaasaminnik ineriartortitsijuarnissaannut periarfissikkusuppagut.

Ilinniarnerup ingerlanera
Ullumikkut peruluttunik peqqissaanermik immikkut ilisimasalittut ilinniarneq ukiuni marlunni Qallunaat Nunaanni ingerlanneqartarpoq. Isumaqatigiissut nutaaq naapertorlugu, ilinniartoq qaammatini siullerni tallimani Dronning Ingridp Napparsimmavissuaniissaaq, qaammatit 13-it Viborgimiissalluini, qaammatillu kingulliit arfinillit Dronning Ingridip Napparsimmavissuaniissalluni. Ilinniarneq naammassippat ilinniarnerminik naammassinnerlaaq Dronning Ingridip Napparsimmavissuani aalajangersimasumik atorfininnissamik neqeroorfigineqassaaq.

Ilinniartoq siulleq 2016-imi januaarip aallaqaataani aallartissasoq, pinasuagassanut immikkoortortami peqqissaanermi aqutsisut oqaatigaat.

Pinasuagassanut immikkoortortami peqqissaasuuneq Jens Jørgen Lemvig ima itisiliivoq:
-Ukiut marluk qaangiuppata Napparsimmavissuarmi peruluttunik peqqissaanermik immikkut ilisimasalik ataaseq ilinniakkaminik naammassinnissinnaanngussaaq. ukiumut marlunnik ilinniartoqartarsinnaalernissaaq naatsorsuutigineqarpoq. Tamanna ukiualuit qaangiunneranni immikkoortumi tassani immikkut ilisimasalinnik imminut pilersornerusinnaalernissamik kinguneqassaaq.

Dronning Ingridip napparsimmavissuata immikkoortui allat aamma ilinniarfiusinnaanngussapput.
Peruluttunik peqqissaanermik immikkut ilisimasalittut ilinniartitaasinnaanerup akuersissutaanera tassaaginnarpoq ilinniartitaanerup Kalaallit Nunaannut nuunneqarsinnaanissaanut alloriarneq siulleq.

Isumaqatigiissusiortoq pinasuagassanut immikkoortortami peqqissaasuuneq Jens Jørgen Lemvig, ima oqaluttuarpoq: Dronning Ingridip Napparsimmavissuata immikkoortuisa allat aamma ilinniarfinngorsinnaanissaat suliniutiginiarparput. Ilinniarfissatut akueritinniarluni suliniuteqarnermut piffissaq annertooq atorneqartarpoq, peruluttunilli peqqissaanermik immikkut ilisimasalittut ilinniartitsisinnaalerneq, Dronning Ingridip Napparsimmavissuata oqaluttuarisaanerani angusaq pingaarnersaavoq.

Paasissutissat sukumiinerusut pisariaqarpallu apersorneqarsinnaasoq:
Pinasuagassanut immikkoortortami peqqissaasuuneq immikkoortortamilu pisortaq - Jens Jørgen Lemvig mailikkut: jejl@peqqik.gl