Naalakkersuisut aaqqissuusseqqittut

Naalakkersuisut utoqqalinersiat aammalu siusinaartumik sulisinnaajunnaarnersiutit pillugit aaqqissuusseqqipput

Naalakkersuit utoqqalinermi pensionisiat aammalu siusinaartumik sulisinnaajunnaarnersiutit pillugit aaqqissuusseqqinnerat ulloq 13. november 2015-imi akuersissutigineqarput. Tamatuma saniatigut inissiani attartukkani akiliutinut tapiissutaasartut pillugit inatsit naleqqussaavigineqarluni. 

Inatsisissat pineqartut akuersissutigineqarnerisigut aaqqissuusseqqinnikkut inatsisit isumaginninnikkut aningaasarsiornikkullu oqimaaqatigiissumik aaqqissuussiffigineqarnissaat, aqqutissiuunneqarluni utoqqaat aammalu sulinermikkut imminnut pilersorsinnaajunnaarsimasut inuuniarnerminni pitsaasumik toqqammaveqarlutik inooqataajuaannarsinnaanissaat.

Utoqqalinerminni pensionisiaqartut pitsaanerusumik atugaqalissapput

Nunatsinni innuttaasut ukiorpassuarni nammaqataareersimallutik utoqqalisimasut pisussaaffigivaat ajunnginnerpaamik toqqissillutik utoqqalinerminni inooqataasinnaasarnissaat, - aamma aningaasatigut atugarisaat eqqarsaatigalugit. Taamaattumik Naalakkersuisut suliniuteqarfigiuarniarpaat utoqqalinerminni naapertuutinngitsumik atugaqartinneqartut suli pitsaanerusumik atugaqalernissaat.

Ukioqqortusiartornerput naapertorlugu 2017-imi utoqqalinermi pensionisiaqarsinnaalernissaq 66-inik ukioqalernissamut aaqqiivigineqarpoq, taavalu 2021-mi 67-inut aaqqiivigineqassalluni. Taamaattorli innuttaasut sulerulussimasut 2021-mi aatsaat 66-inik ukioqalernerminnit aammalu 2025-mi aatsaat 67-inik ukioqalernerminnit aaqqiivigineqartussaassallutik. 

”Nuannaarutissaavoq sivisunerusumik inuusalersimanerput, tamatumali nassatarisaan-nik ukioqqortuneruleraluarluta ukiut marlussuit sulinerusalernissarput, tamatumali kingorna aatsaat utoqqalinermi pensionisiaqartalernissarput.” Taamak oqaaseqarpoq Ilaqutariinnermut, Naligiissitaanermut Isumaginninnermullu Naalakkersuisoq Martha Lund Olsen.”

Inatsit nutaaq 1. januar 2016-imiit atuutilertinneqassaaq.

Siusinaartumik pensionisiallit suli amerlanerusut sapinngikkunik suliffittaartariaqarput

Siusinaartumik sulisinnaajunnaarnersiutit nutaamik aaqqissuuneqarnerisigut pineqartut akornanni sulisinnaassuseqartut namminneq napatissinnaanissamut periarfissinneqassapput. Taamaasiornikkut siusinaartumik pensionisiallit amerlasuut inuuniarnerminni malunnaateqarluartumik oqilisaavigineqartussaassallutik, aammalu inoqatit akornanni aalajaatsumik ataavartumillu suleqataasinnaanissamut periarfissinneqassallutik. Taamaasiornikkut ilaqutaasut oqilisaavigineqassapput, aammali isumaginninnikkut pitsaanngitsumik ingerlaaseqartoqartarnera anigoruminarnerulissalluni. 

Ilaqutariinnermut, Naligiissitaanermut Isumaginninnermullu Naalakkersuisoq Martha Lund Olsen-i tamanna pillugu imatut oqaaseqarpoq: 

”Nuannaarutigeqaara Naalakkersuisut siunnersuutigisimasaat akuersissutigineqarmat. Nunatsinni innuttaasut suli amerlanerit piginnaasaasa atorluarnerisigut suli amerlanerit ineriartornissamut periarfissittariaqarpavut, taamaasillunilu aamma siusinaartumik sulisinnaajunnaarnersiuteqartut akornanni amerlasuut pisortanit pilersorneqarnerminniit imminnut napatinnissamut periarfissinneqassammata, tamatumanilu imminnut inuiaqatigiinnillu iluaqusiinissamut aqqutissiuunneqassallutik.”

Inatsisissaq nutaaq 1. juli 2016-imit atuutilissaaq.

Inissiani attartortittakkani ineqarnermut akiliutinut tapiissutit

Inissiani attartortittakkani ineqarnermut akiliutinut tapiissutit nutaamik aalajangersagartaqalerpoq, taamaasilluni massakkut isertitarisat toqqammavigalugit tapiissutit annertussusilerneqartalissallutik. Tamatumuunali inissiani najugaqarnermi akiliutinut tapiissuteqartitsisarnermi toqqammavigineqartartut pissusiviusunut naapertuuttunngorsaavigineqassapput.

Inatsisissaq nutaaq 1. januar 2016-imit atuutilertinneqassaaq.


Suli paasisaqarnerorusukkuit Martha Lund Olsen-ip allattaa Sina Møller Kristiansen-i, oqarasuaat 53 93 71 aqqutigalugu paasiniaasoqarsinnaassaaq.