Paris-imi pinerliinerit

Tallimanngornermi unnukkut attaveqanngitsunik ataatsikkoortunillu arlariinnik Paris-imi Paris-illu eqqaani nuannaariarfinni saassussisoqarpoq. Tusagassiorfiit nunanit tamalaaneersut minnerpaamik inuit 140-it toqutaasimanerannit nalunaaruteqarput tamassumalu saniatigut ikilerneqarsimasut arlaqarnerannik nalunaaruteqarlutik.

Aallaasersornerit qaartartumeerinerillu ataqatigiissaarneqarsimagunarput. Frankrig-ip upalungaarsimasartui saassussinerit sioqqullugit kalerrisaarneqarnissamut sillimareersimapput, Paris-imi uani qaammammi kingusinnerusukkut nunarsuarmiit tamanit peqataaffigineqartumik silap pissusaanut tunngatillugu naalakkersuisuunerit ataatsimeersuarnissaata aallartinnissaa sioqqullugu. Manna tikillugu eqimattanit arlaannaanilluunniit saassussinerit akisussaaffiginiarneqarsimanngillat. Unnuk manna Frankrig-ip præsidentiata Hollande-p Frankrig-i sukannersumik naalakkersuisoqassasoq nalunaarutigaa.

Vittus Qujaukitsup oqaatigaa:

"Frankrig-imit tusakkat assut aalassassutigaakka. Saassussinerit unnuk manna pisut akuersornanngitsuullutillu ilivitsumik paasiuminaatsuupput.

Taamak immikkut peqqarniitsigisunik pisoqartillugu inuiaqatigiinnut franskinut inunnullu sussuteqanngitsunut saassussinermut eqqugaasimasunut tapersersuinissarput assut pingaartuuvoq.

Naalakkersuisunit neriuutigilluinnarparput nunaqqativut Parisimiittut pisunit tujorminarluinnartunit aniguisimassasut, ilaqutaasullu ilisimaarissagaat ernumanaratillu ajunngitsut."

Kalaallit Paris-imiittut pilertortumik pisariaqartitsinermi danskit nunarsuaq tamakkerlugu piareersimasutut sullissiviannut oqarasuaatikkut +45 33 92 11 12 / bbb@um.dk attaveqarnissaannut siunnersorneqarput.


Paasisaqarnerorusuttut attavissaat: Nunanut allanut pisortaq Kai Holst Andersen, +299 55 33 31.