Tikaagullittassiissutit tamanut ammaanneqarnerat

Tikaagullittassiissutit sinneruttut 13. novemberimiit 2015-imi atuuttumik tamanut ammaanneqarnerat

Kalaallit Nunaata Kitaani tikaagulliit qamutilimmik tuukkartalimmik pisassat 52-it, qoorortoorsornermilu pisassat arfinillit kiisalu Kalaallit Nunaata Kangiani tikaagulliit qoorortoorsorluni pisassat aqqanillit 11. november 2015-imi suli pisarineqarsimanngillat.

Pisassiissutigineqartut tamakkerneqarnissaat qulakkeerniarlugu, Aalisarnermut, Piniarnermut Nunalerinermullu Naalakkersuisoq aalajangiivoq 13. novemberimiit 2015-imiit atuuttumik tikaagulliit pisassiissutigineqartunit sinneruttut 58-it Kalaallit Nunaata kitaani kommunit sisamaasuni ammaanneqassasut tikaagulliillu aqqanillit Kalaallit Nunaata Kangiani aqutsiveqarfinnut marlunnut ammaanneqassallutik.

Angallatit taamatullu ataatsimoorluni piniarnermut peqataasut tikaagullinniarnermik ilisimasaqarluartut nalunaarutini kinguliiniittuni piumasaqaatit malillugit 1. martsimiit 31. novembarimut piniarsinnaapput.

Piniarneq siulersortimik akuersissummik pigisaqartumik aqunneqassaaq, taassumalu aamma akisussaaffigaa pisap kommunimut najugaqarfigisamut ingerlaannartumik nalunaarutigineqarnissaa.

Piniarnissani piumasaqaatit (www.lovgivning.gl)

Arfernik angisuunik piniarneq ukua malillugit ingerlanneqassaaq:

  • Arfernik angisuunik illersuineq pisallu pillugit Namminersorlutik Oqartussat nalunaarutaat nr. 12, 22. december 2014-imeersoq
  • Arfattat angisuut pissatallu nalunaarutigineqartarnerat pillugu Namminersorlutik Oqartussat nalunaarutaat nr. 12, 16. juli 2010-meersoq.

Paasissutissat sukumiinerusut pillugit attavigiuk Immikkoortortaqarfimmi pisortaq Amalie Jessen, oqarasuaat: 34 53 04, e-mail: amalie@nanoq.gl