Raajartassat 85.000 tonsinut amerlineqarput

Nunatta kitaata imartaani raajanut 2016-imut pisassiissutit 85.000 tonsinut amerlineqarput,  ukioq manna rajartassiissutinit 73.000 tonsiusunit 16 procentinik amerlanerullutik.

Biologit nunatta kitaata imartaanut 2016-imut innersuussutaat 90.000 tonsiupput.

Naalakkersuisut ullumi novembarip aqqaneq aappaanni 2015-imi aalajangerput nunatta kitaata imartaani raajartassat 85.000 tonsiussasut.

Aappaagumut pisaasiissutaasunit 2.600 tonsit EU-mut pisassiissutigineqarput, EU-mik isumaqatigiissut naapertorlugu. 2.199 tonsit Canadamut aamma pisassiissutaallutik.

Sinneri avataasiorluni sinerissallu qanittuani raajarniartunut agguarneqassapput, avataasiorluni raajarniartut  45.715 tonsinik pisassaqarlutik sinerissap qanittuani 34.486 tonsinik raajartassaqartut.

Tunumi raajartassanit 5.300 tonsiusunit 200 tonsit nunatsinni kilisaataatilinnut pisassiissutigineqarput EU-mut 5.100 tonsit pisassiissutigineqarlutik.

Innersuussutit amerleriartut

Biologit nunatta kitaata imartaani aappaagu raajartassatut innersuussutaat, ukiuni kingullerni innersuussutaasartunit allaanerupput - amerlanerullutik.  2014-imit 2016-imut innersuussutigineqartut ikileriartorujussuupput 80.000 tonsinit 60.000 tonsinut ikileriarlutik. 2016-imi raajartassutut innersuussutigineqartut 50 procentinik amerleriaateqarput 60.000 tonsinit 90.000 tonsinut.

Naalakkersuisut aamma siusinnerusukkut aalajangerpaat Qimusseriarsuarmi misileraalluni 2015-imi 2016-imilu raajarniartoqarsinnaasoq, tamaani 3.000 tonsit pisarineqarsinnaassallutik. Misileraalluni raajartassiissutigineqartut pisassiissutigineqartut avataatigut.

 

Attavigineqarsinnaavoq: Aalisarnermut, Piniarnermut Nunalerinermullu Naalakkersuisoqarfimmi immikkoortortaqarfimmi pisortaq, Emanuel Rosing. E-mail: emanuel@nanoq.gl