Naalakkersuisut Sorlak ipisinnianngilaat

Meeqqat inuusuttullu kattuffiisa tapiissutisisinnaanerat pillugu Partii Naleqqap tusagassiutinut nalunaaruteqarnerata kingunerisaanik Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisup Nivi Olsenip erseqqissaatigerusuppaa Sorlak ingerlatsinerminut siunissami maannamusut tapiissutisisaannassasoq.

Tipsernermit Lottornermiillu aningaasaliissutinit immikkoortitanik B-nik aqutsineq Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfiup Sorlak isumaqatigereerlugu 2014-ip naanerani tiguaa. Tamanna 2015-imut Aningaasanut Inatsimmi inatsisitigut aalajangersarneqarpoq, aningaasat 2014 tikillugu Sorlaap suliassamut sullissisoqarfigisimasai suliassap nuunneqarneranut peqatigitillugu Naalakkersuisoqarfimmut nuunneqarlutik.

”Meeqqat inuusuttullu kattuffii, taakkununnga ilanngullugu Sorlak ingerlataminnut tapiissutinik qinnuteqarsinnaajunnaassanngillat, ingerlatanut taakkununngarpiaq aningaasassaqaannassammat. Taamaattumik Sorlaap tamatumunnga aningaasanik qinnuteqaruni højskolertitsinikkut, imminortarnermik pinaveersaartitsinikkut il.il. inuiaqatigiinnut attuumassutilinnik tapiiffigineqarsinnaasunillu meeqqanut inuusuttunullu sullissinini ingerlatiinnarsinnaavaa," Nivi Olsen nassuiaavoq itisiliillunilu:

"Sorlammut ingerlatsinermut tapiissutinut tunngatillugu Sorlaap suliassakillineranut naleqqussaasoqarsimavoq tamannali peqatigiiffiup Sorlaap peqatigiiffimmut tapiissutinut tunngatillugu sulisinnaanermut periarfissaanut sunniuteqanngilaq."

Aammattaaq Sorlammut tapiissutit 2016-imut Aningaasanut Inatsisissatut siunnersuummi ikilisarneqarnialersaannginneri peqqissaarnissaq pillugu erseqqissaatigineqassaaq, 2016-imullu tapiissutit 2015-imut Aningaasanut Inatsimmisulli iinnassapput.

Naggasiutigalugu tusagassiorfitsiguinnaq politikimik ingerlatsiniarsarinani Partii Naleqqap sulinissaa Nivi Olsenip kaammattuutigaa:

”Partii Naleqqap 2016-imut aningaasanut inatsit pillugu isumaqatigiinniarnissamut aggersarneqarami naaggaarsinnarluni isumaqatigiinniarusulersimanera eqqumiigaara. Tusagassiorfiit aqqutiginagit Partii Naleraq aningaasanut inatsit pillugu isumaqatigiinniarnermi sammisamik eqqartuisimasinnaagaluarpoq.”

 

Paasisaqarnerorusuttut attavigisinnaavaat Naalakkersuisup allattaa Jens-Frederik Nielsen, oqarasuaat +299 56 02 99 imaluunniit e-mail jfni@nanoq.gl.