Doris tarnikkut nappaatit pillugit ataatsimeersuarnermi peqataavoq

Doris Nunat Avannarliit oqaluttuarisaaneranni siullerpaamik tarnikkut nappaatit pillugit ataatsimeersuarnermi peqataavoq

Peqqissutsimut Naalakkersuisoq Doris Jakobsen Nunat Avannarliit oqaluttuarisaaneranni siullerpaamik tarnikkut nappaatit pillugit ataatsimeersuartoqarnerani Københavnimi tallimanngornermi novembarip arfernani peqataavoq.

Tarnikkut nappaatit pillugit nunani avannarlerni ataatsimeersuarneq danskit peqqinnissaq pillugu ministeriannit siuttuuffigineqartoq Kronprinsesse Mary-p ammarpaa.

”Maani Danmarkimi meeqqat 80.000-t missaat angajoqqaaqarput tarnimikkut nappaateqartunik. Tamatta tarnikkut nappaatilinnik nalunngisaqarpugut, tarnikkut nappaat immikkoortitsineq ajorpoq, kikkulluunniit eqqugaasinnaapput”, taama kronprinsesse Mary Nunani Avannarlerni tarnikkut nappaatillit ilagisaasalu atugaat pillugit ammanerunissaq tapersersorneqarnerunissaannillu kaammattuuteqartoq oqarpoq.

Anguniarneqartoq tassaavoq Nunani Avannarlerni misilittakkat pitsaasut aporfiusartullu ammasumik eqqartorneqarnissaat, suleqatigiinnerullu napparsimasunillu sullissinerup nunat killeqarfii akimorlugit siunissami pitsaanerulersinnissaa.

Nunat Avannarlerni tarnikkut nappaatit pillugit ataatsimeersuartoqarnerata inunnik tarnimikkut napparsimasunik ilagisaannillu pitsaanerusumik sullisinnissaq aqqutissiuussinnaavaa aammalu Kalaallit Nunaanni tarnimikkut napparsimasut ersarinnerulersillugit isumaqarpoq Doris Jakobsen.

Angajoqqaanut, ilaqutaasunut qanigisaasunullu sulissussisarnerit nutaat pisariaqartippavut. Assersuutigalugu meeqqat tarnimikkut napparsimasunik angajoqqaallit meeraqatitik namminertulli napparsimasunik angajoqqaallit naapissinnaaniassagamikkik kiserliortutullu misigiunnaarniassammata katersuuffigisinnaasaminnik napiffigisinnaasaminnik peqalertariaqarput.

“Nunatsinni aamma pisariaqartipparput meeraanermi ilaqutariinnilu ernumanermik  nappaateqarneq akiorniassallugu. Assersuutigalugu tusagaqarpugut suliamik angajoq­qaat sakkussaminnik tunineqartut namminneq meeqqat ernumasut ikiorsinnaaniarlugit aammalu atuarfimmi atugassat tarnikkut napparsimasumik angajoqqaaqarneq. Tamanna misissorusuppara ilinniarfigisinnaaniassagatsigu” naggasiivoq Doris Jakobsen.

Siusinnerusukkut Svenskit ministeriat Bo Könberg 2014-imi nalunaarusiakkut innersuussutigisimavaa Nunani Avannarlerni peqqinnissaqarfikkut suleqatigiin­nerunissaq. Qitiusumik innersuutaasimavoq tarnikkut napparsimasunik sullissineq nukittooq pilersinneqassasoq Nunani Avannarlerni ukiumullu ataasiarluni ataatsimeer­suartarnissaq. Tamannalu peqqutaavoq Danmarki ukioq manna Nunat Avannarlerni ataatsimeersuartitsimmat.

 

Paasissutissanik allanik pissarsiniaruit attavigiuk Peqqissutsimut Naalakkersuisoq Doris Jakobsen allattaa Rosa Thorsen aqqutigalugu, oqarasuaat +299 55 33 03 sianerfigalugu imaluunniit e-mail rosat@nanoq.gl allaffigalugu