Qimarnguiit pillugit ataatsimeersuarnermut nunarput peqataassaaq

Nunani tamalaani qimarnguiit pillugit Haag, Hollandimi ataatsimeersuarnissamut nunarput peqataatitaqarniarpoq.

Ulluni 3.-6. novembarimi nunarsuarmioqatigiit qimarnguiit pillugit ataatsimeersuassapput, taaguuserneqarneqarsimasumi 3nd World Conference of Women’s Shelters, Holland-imi Haag-imi pisumi.

Nunatsinniit qimarnguiit marluk peqataatinneqarput. Tassaallutik Nuna tamakkerlugu Qimarnguik Illernit Qeqertarsuaq, kiisalu Nuummi Meeqqanut Ilaqutariinnullu sullissivik.

Ataqqinartorsuaq Kunngissap nulia aammalu ataqqinartorsuaq Dronning Máxima, Holland-imeersoq pingaarnertut ataatsimeersuarnissami oqalugiaateqartussaapput. Isumasioqatigiinnerup siunertarivaa ilisimasanik misilittakkanillu kulturit naalagaaffiillu assigiinngitsut aqqutigisimasaannik paarlaasseqatigiinnissaq – naggataatigut arnat annersarneqartarnerisa unitsinneqarnissaa siunertaralugu.

Ataatsimeersuarnermi peqataatitaq Stina Mølgaard, Nuna tamakkerlugu Qimarnguimmi Illernit, Qeqertarsuarmeersoq oqalugiaateqassaaq, oqaluttuarissallugulu Illernini sulinertik pillugu.

Tamanna pillugu Naalakkersuisoq Martha Lund Olsen imatut oqaaseqarpoq: ”Nuannaarutigeqaara nunarput periarfissinneqarmat suliniutit aallartissimasatta ilaannut tunngassuteqartumik saqqummiisinnaagatta, neriuutigaaralu taamatut suliniuteqarnerput allanut aqqutissiuusseqataajumaartoq.”

Ataatsimeersuarnermi suleqatigiiffiit arlaqaqisut immikkut sammiveqartinneqartunik suliaqartussat piareersarneqarsimapput. Ajornartorsiutit imaannaanngitsut eqqartugassarissavaat, ilanngullugu arnat pissaanermik eqqorneqarsimasut ”empowerment” –i aqqutigalugu nunani assigiinngitsuni ajunnginnerusumik pineqalersinnaanissaat oqariartuutigineqassalluni.

Taamatut kingullermik isumasioqatigiittoqarpoq 2012-mi Washington-imi pisumi aamma nunatsinnit peqataaffigineqartumi. Tamanna sioqqullugu aamma Alberta, Canadami 2008-mi ataatsimeersuartoqarnikuulluni. Nunarsuatsinni arnat qimarnguiisa suleqatigiiffiat nunani assigiinngitsunit qimarnguinnit suleqatigiiffiusoq (GNWS) isumasioqatigiissitsinermik aaqqissuussisuuvoq.

Paasissutissat:

Ilaqutariinnermut, Naligiissitaanermut Isumaginninnermullu Naalakkersuisoqarfik piginnaasanik ineriartortitsivimmik Kattunneq-mik aallartitsisimavoq. Taanna ingerlanneqarpoq suleqatigalugit: Danner, nunatsinni qimarnguiit, Mælkebøttecenteret aammalu Oak Foundation, Denmark. Suleqatigiinneq aallartisarneqarpoq maj 2014-mi Nuummi suleqatigiiaakuuttaarluni isumasioqatigiissitsinermi. Suliniut 2016-i ilanngullugu ingerlanniarneqarpoq.

 

 

Attavissaq: Immikkoortortaqarfimmi pisortaq Ellen Magnussen, Ilaqutariinnermut, Naligiissitaanermut Isumaginninnermullu Naalakkersuisoqarfik, oqarasuaat 34 66 20 imal. email ello@nanoq.gl