Isumalioqatigiissitami ilaasortat nutaat tikilluaqquneqarput

Saammaateqatigiinnissamut Isumalioqatigiissitaq pingasunik nutaanik ilaasortaqalerpoq Kalaallit Nunaanni saammaateqatigiinnissamut suliap ingerlanerani siuarsaaqataasussanik. Ilaasortat nutaat tassaapput Josef Therkildsen Nuummeersoq siornatigut SIK-mi Siulittaasumut tulliusimasoq, Dorthe Katrine Olsen Sisimiuni KTI-mi ilinniartitsisutut atorfilik aammalu Anna Heilmann Maniitsumi Qeqqata Kommuniani ilinniartitaanermut pisortaq. Josef Therkildsen Naalakkersuisuninngaanniit Saammaateqatigiinnissamut Isumalioqatigiissitami siulitaasussatut toqqarneqarpoq.

“Nuannaarutigaarput Saammaateqatigiinnissamut Isumalioqatigiissitami ilaasortat nunaat tikilluaqqussallugit. Ilaasortat nutaat Josef Therkildsen, Dorthe Katrine Olsen Anna Heimannilu inuttut immikkoorutitik assigiissuteqarfigaat, tassaasoq kalaallini inuiaqatigiinni pisunut paasisimasaqarnerat. Ilisimasaat inuiaqatigiinnut tunngassuteqartut aammalu misilittakkaminnut tunngavigisaat pinngitsooratik isumalioqatigiissitami sulinermi iluaqutaasussaapput, aammalu qularnanngilaq pingaartitanik tapersiiumaartut isumalioqatigiissitamut suli annertunerusumik nukittorsaataasussanik. Siulittaasumik toqqaasoqarnera aamma nuannaarutigaarput. Tulliuttoq tassaassaaq, uagut isumalioqatigiissitami nammineq siulittaasup tullissaanik toqqaanissarput. Isumalioqatigiissitami sulinermi suleqatigiinnissarput ineriartortitseqqinnissarpullu qilanaaraarput. “Isumalioqatigiissitaq sinnerlugu taama oqarpoq Jens Heinrich.

Isumalioqatigiissitaq nalinginnaasumik tulliani ataatsimiissaaq ulluni 24-25. November 2015 Nuummi, aamma pilersaarutigaat sisamanngornermi 26. November 2015 innuttaasunik ataatsimiisitsinissartik, Nuummi katersortarfimmi nal. 19-21.

Taassuma saniatigut isumalioqatigiissitaq Kommune Kujallermi sumiiffinni arlariinni innuttaasunik ataatsimiisitsissaaq piffissami 7-12. December 2015 aammalu Qeqqata Kommuniani piffissami 14-18. December 2015. Paasissutissat ilaat kingusinnerusukkut nalunaarutigineqarumaarput.

Paasissutissat annertunerusut isumalioqatigiissitap nittartagaani takuneqarsinnaapput uani www.saammaatta.gl

 

 

Attavissaq:Saammaateqatigiinnissamut Isumalioqatigiissitap Allattoqarfia, Mari Kleist, email: marh@nanoq.gl

oqarasuaat: 53 78 28