Naalakkersuisut nutaamik katitigaanerat

Aningaasaqarnermut Aatsitassanullu Naalakkersuisup Andreas Uldumip, Demokraatit, qaammatini pingasuni sulinngiffeqarallartussanngornerata kingunerisaanut Naalakkersuisut katitigaanerisa nutaamik aaqqissorneqarnissaat Inatsisartut akueraat.

”Ulluinnarni suliaqarnermi aammalu Naalakkersuisut katitigaaneranni politikkikkut oqimaaqatigiissitsinissaq attatiinnarniarlugu, Inatsisartunut ilaasortap Randi Vestergaard Evaldsen-ip, Demokraatineersup Naalakkersuisuni ilaasortatut nutaatut akuerineqarnissaa inassutigissallugu aalajangerpunga. Tamatuma peqatigisaanik annikinnerusumik akisussaaffeqarfinnik paarlaassuinermik kinguneqassaaq, tassami akisussaaffeqarfiit Inuussutissarsiorneq, Suliffeqarneq aamma Niuerneq Randi Vestergaard Evaldsen-imut tunniunneqassapput. Akisussaaffeqarfiit Aningaasaqarneq, Aatsitassat Nunanullu Allanut susassaqarfiit Naalakkersuisunut ilaasortamut Vittus Qujaukitsumut, Siumumeersumut tunniunneqassapput”, Naalakkersuisut Siulittaasuat Kim Kielsen oqarpoq.

Nutaamik imannak aaqqissorneqarput:

  1. Knud Kristiansen, Atassut, Ineqarnermut, Sanaartornermut Attaveqarnermullu Naalakkersuisuuginnassaaq.
  2. Vittus Qujaukitsoq, Siumut, Aningaasaqarnermut, Aatsitassanut Nunanullu Allanut Naalakkersuisunngussaaq.
  3. Karl-Kristian Kruse, Siumut, Aalisarnermut, Piniarnermut Nunalerinermullu Naalakkersuisuuginnassaaq. 
  4. Martha Lund Olsen, Siumut, Ilaqutariinnermut, Naligiissitaanermut Isumaginninnermullu Naalakkersuisuuginnassaaq.
  5. Doris Jakobsen, Siumut, Peqqissutsimut Nunanillu Avannarlernik Suleqateqarnermut Naalakkersuisuuginnassaaq.
  6. Nivi Olsen, Demokraatit, Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisuuginnassaaq.
  7. Mala Høy Kúko, Atassut, Pinngortitamut, Avatangiisinut Inatsisinillu Atuutsitsinermut Naalakkersuisuuginnassaaq.
  8. Randi Vestergaard Evaldsen, Demokraatit, Inuussutissarsiornermut, Suliffeqarnermut Niuernermullu Naalakkersuisunngussaaq.
  9. Andreas Uldum, Demokraatit, Naalakkersuisunut ilaasortaq (sulinngiffeqarpoq)