Kattuffiit tusarniarpagut!

Ullumikkut Inatsisartuni siullermeerutigineqassalluni imarsiorluni aalisarnermi qaleralinnut avaleraasartuunullu akitsuutit pillugit Naalakkersuisut siunnersuutaat saqqummiunneqassaaq (imm. 21). Qaleralinnik, suliarineqaqqaaratik, imaluunniit taamaallaat annikitsuaqqamik suliarineqareerlutik avammut tunineqartartunik akitsuusersuisarnissaq siunnersuummut ilaavoq.

Piffissami kingullermi siunnersuutip ilaa taanna kikkunnit tamanit oqallissutaasimavoq. Ingammillu qaleralinnik sinerissamut qanittumi nalinngarmik akitsuutinngortillugu Naalakkersuisut siammartitaqarnissaannik kattuffiit SIK, KNAPK aamma GE ataatsimoorullugu siunnersuuteqarsimapput.

”Taamatut iliuuseqarlutik kattuffiit akitsuuteqartitsinermik politikkip pitsanngorsarnissaanut akisussaaqataaniarnerallu nuannaarutigaara, taamaattumillu siunnersuutigisaat tusaatissatut tigorusuppara”, Aningaasaqarnermut Naalakkersuisoq Vittus Qujaukitsoq oqarpoq.

Taamaattumik imarsiorluni aalisarnermi qaleralinnut avaleraasartuunullu akitsuuteqartitsineq pillugu siunnersuutip aappassaaneernissaata tungaanut Naalakkersuisuugallartup allannguutissatut siunnersuut saqqummiunniarpaa, taamaalilluni qaleralinnut akitsuut 5 procentimik annertussusiligaq (assingalugu kilonut ataasiakkaanut 80 øre) atuutsinneqalissalluni. Tamatuma ukiumoortumik Nunatta Karsia koruuninik 20 millioninik isertitaqartissagaa naatsorsuutigineqarpoq, taamaalilluni ukiunut sisamanut Aningaasanut Inatsisip ingerlatsinermut sanaartornermullu aningaasartuutaanni oqimaaqatigiissitsinissaq pillugu anguniagaq attanneqassalluni.

Inussiarnersumik inuulluaqqusillunga

Vittus Qujaukitsoq
Naalakkersuisunut ilaasortaq

 

Annertunerusumik paasissutissanut attavigiuk tusagassiornermut ataqatigiissaarisoq Martin Christiansen, oqarasuaat angallattagaq: 221533