Kitaani tikaagulliit paggatassiissutit nungupput

Kitaani tikaagulliit 10-t pisassiissutiniit ataatsimoorussamik piniaqatigiilluni paggatassiissutit nungupput

Aalisarnermut, Piniarnermut Nunalerinermullu Naalakkersuisoqarfiup matumuuna nalunaarutigissavaa tikaagulliit 10-t ataatsimoorussamik piniaqatigiilluni paggatassiissutaasut nungummata, taamatut piniarneq ingerlaannaq matuneqarpoq.

Aqutsiveqarfinni tamani pisassiissutinit nalinginnaasunit pissarsiarereersimasat pigiinnarneqassapput. 

Tikaagullittassiissutit tamakkerlugit 2015-imi 179-put. Ulloq 2. november Kitaani ataatsimoorussamik piniaqatigiinnermit tikaagulliit 72-it pisarineqarsimapput aamma qamutilissorluni piniarnermit tikaagulliit 49-t, tamakku kinguneraat pisassiissutinit katillugit sinneruttut 58-iupput, taakkunannga qoorortuumik pisassat 9-t. 

Tunumi tikaagulliit 4-t pisarineqarsimapput, pisassiissutinit sinnerullutik 11-it. 

Pisarineqarsimasunut paasissutissat pisaasimasut nalunaarutigineqartarnerinit tunngaveqarput, APNN-imiit 2. november 2015-imi pissarsiarineqarsimasut. Taamaattorli alaatsinaaqquneqarput nalunaarutiginninnerit ataasiakkaat suli APNN-imut tunniunneqarsimanngitsut.

Angallatit kiisalu ataatsimoorluni piniaqatigiilluni peqataasut tikaagullinniarnissamut teknikkikkut akuersissutigineqarsimasut, takuuk nalunaarutini ataani allaqqasuni pisaqarsinnaanermut piumasaqaatit piffissami 1. martsimiit - 30. novemberimut.

Piniarneq siulersortimik akuersissummik pigisaqartussamik aqunneqassaaq, taassumalu aamma akisussaaffigaa pisarineqartut erniinnaartumik kommunimut najugarisamut nalunaarutigineqartarnissaat. 

Piniarnissamut piumasaqaatit (www.lovgivning.gl)

Arfernik angisuunik piniarneq ingerlanneqassaaq tulliuttut naapertorlugit:  

  • Arfernik angisuunik illersuineq piniarnerlu pillugit Namminersorlutik Oqartussat nalunaarutaat nr. 12, 22. december 2014-imeersoq
  • Arfattat angisuut pissatallu nalunaarutigineqartarnerat pillugu Namminersorlutik Oqartussat nalunaarutaat nr. 12, 16. juli 2010-meersoq.


Paasissutissat sukumiinerusut pillugit attavigiuk: Immikkoortortami pisortaq Amalie Jessen, oqarasuaat: 34 53 04, email: amalie@nanoq.gl.