Kiffartuussinissamut isumaqatigiissutit sivitsorneqarput

Kiffartuussinissamut isumaqatigiissutit sivitsorneqarnerat inissippoq

Naalakkersuisut ulloq 30. oktober 2015 ataatsimiinnerminni ilaasunik, nassiussanik allakkanillu Kalaallit Nunaata iluani assartuussineq pillugu kiffartuunneqarnissamut isumaqatigiissutit sivitsorneqarnissaat akuersissutigaat.  

Ineqarnermut, Sanaartornermut Attaveqaqatigiinnermullu Naalakkersuisoq, Knud Kristiansen tassunga tunngatillugu ima oqaaseqarpoq:

 ”Assut nuannaarutigaara, Naalakkersuisut tamarmiullutik kiffartuussinissamut isumaqatigiissutit sivitsorneqarnissaannut tunngavissat akuersissutigimmassuk, angallassinermik sullissisut 2016-mi kiffartuussinermut isumaqatigiissutit sivitsorneqarnissaannut aallaavissatik sunalu naatsorsuutigisinnaanerlugu ilisimannilernerannik tamanna isumaqarpoq.

Kiffartuussinissamik isumaqatigiissutit sivitsorneqarnissaannut atatillugu tamaviaarsimavugut attanneqarsinnaasumik tunngavissaqalernissatsinnut sapinngisamik sukkasuumik naammassinninniarluta, paasilluarsinnaavaralu innuttaasut angalaniarlutik aaqqissuussiniartut akimmisaartinneqarsimanermik misigisimasimassappata, taamaammat assut nuannaarutigaara angallassisartut massakkut ilisimalermassuk piffissami sivitsuiffimmi sorpiaat tunngavigalugit ingerlatsissanerlutik.

Tassunga tunngatillugu nuannerpoq, angallassisartut ataatsimoorlutik erseqqissaatigimmassuk, billetsinik tuniniaanertik ingerlateqqissinnaalerlugu, tassungalu tunngatillugu nuannaarutigaara kiffartuussineq qaffasissoq attatiinnarneqarsinnaammat, naak massa aningaasatigut tunngavissat sukannersuugaluartut.

Qularutiginngilara Diskoline, Air Greenland aammalu Arctic Umiaq Line pisinnaasartik naapertorlugu isumaqatigiissutinilu sinaakkutassarititaasut iluanni angallassinerminni qaffasissumik pitsaassusilimmik angalasussarpassuarnut kiffartuussiumaartut.  

Kiisalu kingumut qissimillunga nuannaarutigivara isumaqatiginninniarnerit pitsaasumik ingerlanneqarsimammata, periarfissarlu manna atorlugu angallassisartut tamaasa annertuumik qujaffigerusuppakka.”

Kiffartuussinermut isumaqatigiissutit ukiumik ataatsimik sivitsorneqassapput, piffissap taassuma ingerlanerani kiffartuussinermik isumaqatigiissutit nutaat 1. Januar 2017-miit atuutilertussat isumaqatigiinniutigineqassallutik. Naalakkersuisut naatsorsuutigaat, kiffartuussinermut isumaqatigiissutit nutaat 2016-mi aasaanerani sulinngiffeqalinnginnermi naammassineqareerumaartut.

 

Sukumiinerusumik paasisaqarusuttunut attavissaq:
Naalakkersuisup allattaa Jensine Berthelsen +299562303
jebe@nanoq.gl