Kalaallit Nunaat Beijingimi nittarsaanneqarpoq

Kalaallit Nunaanni takornariaqarneq inuussutissarsiornerullu iluani suliat Beijingimi nittarsaanneqartut

Kinamut tikeraarneq naggaserlugu Inuussutissarsiornermut, Suliffeqarnermut, Niuernermut Nunanullu allanut Naalakkersuisoq Vittus Qujaukitsoq Beijingimi danskit aallartitaqarfiani Kalaallit Nunannit tikeraartut aaqqissuussineranut qaaqqusisuuvoq. Inuit 100-ut pallillugit takkupput, tassanilu Naalakkersuisut takornariaqarnermut tunngasunut pilersaarusiassaat, Kalaallit Nunaat tikeraarfissatut saqqumiunneqarnera aammalu nerisassaatigut pissanganaqisut peqataasunut misigitinneqarput.

Kinamiut angalatitsivinneersut tusagassiortullu Kalaallit Nunaannut issittumullu immikkut soqutigisallit qaaqqusinermut peqataapput. Aaqqissuussineq naggaserneqarpoq, Great Greenlandimiit puisit amii atorlugit atisaliat kingulliit aammalu Royal Greenlandimiit nerisassanik immameersunik ulloqeqqasiutigineqarlutik.

Angalatitsivik Albatros Travel China Kinami angalatitseqatigiiffik Caissa suleqatigalugu takornariartaamik angallassiniarput, 2017-milu Kinamiut 220-inik amerlassusillit Kalaallit Nunaata sineriaa takornariartissamaarpaat.

“Nuannaarutigaara Kinami aaqqissuussisarnerit uteqqiasut Kinamiumut pulaartunut tuniniaanernik isumaqatigiittoqarneranik kinguneqartarmata” Vittus Qujaukitsoq oqarpoq nangillunilu: “Kalaallit Nunaanni periarfissanut malunnartumik soqutiginninneq maanna pisumi soqutigineqaqaat. Ilimagilluinnarparalu tamanna annertuumik ingerlatsisoqalernissaanut aallarniutaasoraara”.

Kalaallit Nunaannit peqataasut Kinamiut suliffeqarfiutaannut aningaasaliisarfinnullu suliat aningaasaliiffigineqarsinnaasut saqqummiuppaat. Pingaarnertut sammineqarput erngup nukinganik innaallagissiornermut suliat aammalu attaveqarnermut tunngasut. Ataatsimiittarnernilu sikumik imermillu sulianut aningaasaliinissat soqutigineqarluarput.

 

Nunatsinnit aallartitat Kinamut tikeraarnerminni Islandimiut aallartitaat naapeqatigaat niueqatigiinnissamut periarfissaasut eqqartorneqarlutik, arfininngornermilu nunatsinnut aallassapput.

 

Kinamiit isumaqatigiissusiornerit arlallit saniatigut Kalaallit Nunaannit aallartitat siunnersuutit piviusut pilersitsiniarnerillu suliarineqaqqittussat siunissami qaninnermi suliassat angerlaatissavaat.

 

Apeqqutissaqaraani Naalakkersuisup allattaa, Nauja Møllerip oqarasuaataanut normut uunga, +299 54 41 42-mut attavigineqarsinnaavoq.