Nunat Avannarliit Siunnersuisoqatigiivi siunnersuivoq

Nordiske flag

Nunat Avannarliit Siunnersuisoqatigiivi: Nunani avannarlerni naalakkersuisut nunatsinni Naalakkersuisut angalaqatigiittartartuisa periuserisaat ilinniarfigisariaqarpaat.

Nunat Avannarliit Siunnersuisoqatigiiffiat 67-issaanik ataatsimeersuarneranni ulluni makkunani Reykjavíkimi ingerlanneqartumi, inersimasut meeraanerminni kinguaasiutitigut atornerlunneqarsimanertik pissutigalugu atugarliutaannik immikkut iliuuseqartoqarnissaa pillugu siunnersuut akuersissutigineqaqqammerpoq.

Siunnersuutip akuersissutigineqarneratigut Nunani Avannarliit Siunnersuisoqatigiiffiat, tassalu nunani avannarlerni inatsisartuni ilaasortat naalakkersuisullu (ministerråd) suleqatigiiffigisaani akuersissutigineqarneratigut, nunani avannarlerni nalunaarusiortoqarlunilu suleqatigiiffiliortoqassaaq, tamatumuunalu siunertarineqassalluni Nunani Avannarlerni inersimasut meeraanerminni kinguaasiutitigut atornerlunneqarsimanerminnik kingunipiluuteqartut iliuuseqarfigineqarnissaat aqqutissiuunneqassasoq.

Tamatumani siunertarineqarpoq ilaatigut nunatsinni misilittagarineqartut iluaqutiginiarneqassasut, tamatumani Naalakkersuisut pilersissimasaat “Angalaqatigiittartut - Kalaallit Nunaanni periuseq  ”.    

Ilaqutariinnermut, Naligiissitaanermut Isumaginninnermullu Naalakkersuisoq Martha Lund Olsen imak oqaaseqarpoq: “Nunatsinni angalaqatigiittartunik pilersitsilluta immikkoortumik periuseqarnerput nunani avannarlerni atorneqarusulersimanera nuannerluinnarpoq . Nunani Avannarlerni Ataatsimeersuartarnerni aatsaavissuaq siullermeersumik nunatsinni isumaginninnikkut suliniuteqartarnitsinni misilittakkavut aallaaviginiarneqartillugit takuarput ”.   

Nunani Avannarlerni atugarissaarnikkut ataatsimiititaliaq   “Angalaqatigiittartut - Kalaallit Nunaanni periuseq ” tusarniaavingalugu Nuummiissimapput.  

Nunani Avannarlerni atugarissaarnikkut ataatsimiititaliaq, Nunani Avannarliit Ataatsimeersuarneranut siunnersuuteqartut, junip qaammataani Nuummiipput  tusagarisimasatik toqqammavigalugit, Naalakkersuisut inersimasunut meeraanerminni kinguaassiutitigut atornerlunneqarsimanerminnik kingunipiluuteqartut  immikkut suliniuteqarfigineqarnerat  saqqummiunneqartoq tusarnaarpaat.  

“Angalaqatigiittartut suliniutaavoq aalajangersimaqqinnaartumik siunnerfeqartoq aammalu takusinnaasatsitut angusaqarfiusartoq. Uannummi pingaaruteqarpoq qanoq iliuuseqarnissarput – aammalu iliuuseqaatigisagut malunnaatilimmik iluaqutaassuseqartut takusinnaallugit. Nunani Avannarlerni qinikkat maaniikkamik soqutigisorujussuusimavaat, misilittakkavut tusarfigissallugit aammalu tupigusuutigalugu taamak angusarissaartigisinnaasimagatta.” Taamak oqarpoq Ilaqutariinnermut, Naligiissitaanermut Isumaginninnermullu Naalakkersuisoq Martha Lund Olsen.

Inuit 315-t angalaqatigiittartunut saaffiginnissuteqarsimapput. 279-it manna tikillugu katsorsarneqarsimalerlutik.   

Annertunerusumik paasisaqarusukkuit attaveqarfigisinnaavat Ivalu Nørreslet Rex oqar. 346034 imaluunniit e-mail: ivno@nanoq.gl aqqutigalugu.