Avaleraasartoortassat suliarineqarneranni Naalakkersuisunut pasilliutit eqqunngitsut

Naalakkersuisunut eqqunngilluinnarlunilu narrunarpoq Aqqaluaq B. Egede IA-mit Hans Enoksenilu Partii Naleqqamit tusagassiorfinnut nalunaarutigineqarmat Naalakkersuisut 40 mio. kr. missaat kammalaatersorlutik ikioqatigiissutiginerarlugit pasilliutigalugu.

Naalakkersuisut arlaannaalluunniit imminnut kammalaatinulluunniit taamannak sullissinngillat, 5 koruuni 40 million koruunilluunniit pineqaraluarpata.

Avaleraasartoortassat 2015-imi agguaanneqarnerat pillugu ingerlatsinermik kukkunersiuilluni misissuisoqarnissaa Naalakkersuisut namminneq suliniutigaat aningaasartuutigalugulu. Misissuineq tallimanngormat saqqummiunneqarpoq, inerniliunneqartullu ilagaat kammalaatersortoqarsimananilu inatsisinik unioqqutitsisoqarsimanngitsoq.

Aqqaluaq B. Egede, IA, aamma Hans Enoksen, Partii Naleraq akerlianik oqariartuuteqarunik pasilliutigalugulu Naalakkersuisut kammalaatersorsimallutillu inatsisinik unioqqutitsisimasut, tamanna ilisimasat akerlianik oqariartorneruvoq – misissuinerummi inernera namminneerlutik atuarnissaanut periarfissaqarluarsimapput, paasisimassallugulu inatsisinik unioqqutitsisoqarnanilu kammalaatersortoqarsimanngitsoq. Innuttaasunut suliagut pillugit salluliorluni Naalakkersuisut uppernassusaannik toqqaannartumik innarliiniarnertut tamanna paasisariaqarpoq.

Politikkimik suliaqarnerluni assigiinngitsunik aqqusaagassaqarnartarpoq. Pissutsit taamaapput, ilaqartarpormi allat akigalugit malugeqqusaartartunik. Naalakkersuisuni tamanna misigereeqaarput. Kisianni Aqqaluaq B. Egede Hans Enoksenilu killissaa qaangerujussuarpaat. Pasilliinerit taamaattut allanit pisimagaluarukkit pinerluttaalisitsinermi inatsit naapertorlugu eqqunngitsumik pasilliisutut politiinut nalunaarutiginissaat eqqarsaatigisimassagaluarpara, ilisimasammi akerlianik eqqunngitsunik tusagassiorfinnut nalunaarummi unnerluutiginnittoqarmat.

Politikkimili ajornartorsiutit iluarsiniarneranni politiit eqqartuussiviillu atornissaat sapinngisamik pinngitsoortinneqartariaqarnerannik isumaqartunut ilaavunga. Taamaammat oqaatigiinnartariaqarpara Aqqaluaq B. Egedep Hans Enoksenillu taamannak tusagassiorfinnut nalunaaruteqarnermikkut ajuusaarnarisannik pissusilersormata. Allat akigalugit imminut sassartinniarnermi suulluunniit aqqutiginiarneqarsimarpasipput. Tamanna mamaaqaaq.

Aqqaluaq B. Egedep Hans Enoksenillu tusagassiorfinnut nalunaarutiminni aamma  Aalisarnermut Naalakkersuisup Siumunilu allattaanerup KNT-mik ingerlatseqatigiinnerarlugit allapput. Aammaloorluni eqqunngitsumik oqariartuuteqartoqarpoq. Naalakkersuisoq Karl-Kristian Kruse nammineerluni nassuiaateqareerpoq nakerisarsiunngitsumillu arlaannaannulluunniillu attuumassuteqanngitsumik ingerlatsinermik kukkunersiuilluni misissuinermi aamma erseqqissumik nassuiarneqareerpoq.

Karl-Kristian Kruse siulersuisunit tunuaramili KNT-imik ingerlatseqataajunnaarpoq, tamannalu pivoq Aalisarnermut, Piniarnermut Nunalerinermullu Naalakkersuisunngorami siorna decembarimi. KNT-mi piginneqataassutini ulloq 23. februar 2015 tunniuppaa. Ingerlatsivimmi piginneqataassutit pigiunnaarniuarlugit isumaginerat qaammatialunni ingerlasinnaanerat tupinnartoqanngilaq. Karl-Kristian Krusep KNT-mi piginneqataajunnaarnera pillugu ilisimasakka naapertorlugit Qinigaanerup Misilinneqarnissaanut Ataatsimiititaliamit oqaaseqaateqartoqanngilaq.

Aqqaluaq B. Egedep Hans Enoksenillu Karl-Kristian Kruse ingerlatsivimmik aqutsisooqataaneraanera ilumuunngilaq unneqqarinnanilu.

Innuttaasut salluliorluni uppertinniarneqarnerat ingasappallaaqaaq.

Aqqaluaq B. Egede Hans Enoksenilu aamma allapput KNT immikkut ittumik Naalakkersuisunit tapersersorneqarsimasoq.

Aqqaluaq B. Egedep Hans Enoksenillu pasilliinerattut Naalakkersuisut KNT-mik immikkut tapersersuinngilluinnarput, KNT immikkut ittumik Naalakkersuisunit tapersersorneqanngillat iluanaarniapilullunilu pissaanermik Naalakkersuisuni atornerluisoqanngivippoq.

Ilaanni nalorninarsisarpoq immikkut ilisimasalinnit nakerisarsiunngitsunit arlaannulluunniillu attuumassuteqanngitsunit allaffissornittaa aalajangiisarnittalu misissorneqarnissaannut aningaasanik nukinnillu atuinissaq ilumut iluaqutaanersoq, tassami paasissutissat illuatungiliuttunit soqutigineqarneq ajorput unnerluutiginninnerillu ilumuunngitsullu uteqattaartuarneqartarput, soorlu matumani ukiup affaa taamaassimasoq.

Tulluarnerusimassagaluarpoq misissuinerup inernera Aqqaluaq B. Egedep Hans Enoksenillu tigulluarsimagaluarunikku nuannaaqatigalutalu Namminersorlutik Oqartussat innuttaasut tatiginninnerat naleqartitaallu ileqqorissaartumik iluamillu sullimmatigit.

Aqqaluaq B. Egede Hans Enoksenilu tusagassiorfinnut nalunaarummi apeqqutigaat Naalakkersuisooqatigiinni partiit qanoq oqarnersut.

Partiimi nammineq siuttutut erseqqissumik paatsuugassaanngitsumillu oqaatigissavara: Avaleraasartoortassat 2015-imi agguarneqarnissaat pillugu Naalakkersuisuni aalajangiivugut kammalaatersornertaqanngitsumik inunnullu ataasiakkaanut ingerlatseqatigiiffinnullu immikkut qajassuussinata. Ingerlatsinermik kukkunersiuilluni misissuinerup takutippaa allaffissorneq pitsaanerulertariaqartoq. Misissuinerulli aamma takutippaa, arlaannut immikkut salliutitsiniarsimannginnerarluta aalajangiusimanerput ilumoortoq. Misissuinerup aamma uppernarsarpaa Karl-Kristian Krusep suliamut attuumassuteqarnera pillugu Naalakkersuisut sulisimanerat malittarisassat malillugit ingerlarsimasoq.

Aqqaluaq B. Egedep Hans Enoksenillu tusagassiorfinnut nalunaarummi naggataani Naalakkersuisut isertuussinerarpaat. Naalakkersuisut isertuussassaqanngillat.

Akerlianik iliorpugut, tassami nakerisarsiunngitsumik arlaannaannulluunniillu attuumassuteqanngitsumik ingerlatsinermik kukkunersiuilluni misissuinerup inernera saqqummiupparput, tassanilu avaleraasartoortassanik 2015-imi agguaanermi sulisimaneq tamaat misissoqqissaarneqarsimavoq. Misissuinermi eqikkarlugu inerniliunneqarpoq Naalakkersuisut sulineranni kammalaatersortoqarsimanngitsoq kiffartuussisoqarsimanngitsoq suliamullu attuumassuteqarluni sulisoqarsimanngitsoq.

Aqqaluaq B. Egedemit Hans Enoksenimiillu tusagassiorfinnut nalunaarut allaanngilaq Naalakkersuisunik sussaarutiliivinnermi mamarliiniarnerusoq, tassami allaganngorlugu maanna takussutissaqalerpoq Naalakkersuisut sulinertik iluamik paaralugu torersumik ingerlakkaat.

 

Kim Kielsen,
Naalakkersuisut Siulittaasuat