Nunanik avannarlernik Nunatta suleqatiginninnera suli pingaaruteqarpoq

Nunat Avannarliit Siunnersuisoqatigiiffiat aqqutigalugu Nunanik avannarlernik Nunatta suleqatiginninnera suli pingaaruteqarpoq

Reykjavikkimi Nunat Avannarliit Siunnersuisoqatigiiffiata ataatsimeersuarnerani Nunat Avannarliit akornanni annertunerusumik qaninnerusumillu suleqatigiinnissamut periarfissat Nunat Avannarliit Naalakkersuisuisa siulittaasuisa Siunnersuisoqatigiiffiullu ilaasortaasa oqallisigaat.

Naalakkersuisuni ilaasortaq Knud Kristiansen oqallinnermi peqataavoq, erseqqissaateqarlunilu nunat avannarliit akornanni suleqatigiinneq Kalaallit Nunaata isaanik isigalugu suleqatigiinnermut nangittumik ilaanissaq periarfissanik arlalinnik peqartoq. Nunani Avannarlerni suleqatigiinneq Kalaallit Nunaannit periarfissat nukiillu isumalluutit tunngavigalugit arlalippassuartigut atorluarneqareerpoq.

Inatsisartut ukiaanerani ataatsimiillutik aallartimmata Naalakkersuisut Siulittaasuata ammaalluni oqalugiarnera innersuussutigalugu, Knud Kristiansen oqarpoq, Kalaallit Nunaata nunanut allanut politikkianut Nunat Avannarliit suleqatigiinnerannut peqataaneq pingaaruteqartoq, taamaaliornikkummi Inatsisartuni Naalakkersuisunilu ilaasortat nunani avannarlerni Inatsisartoqatitik Naalakkersuisoqatitillu toqqaannartumik oqaloqatigalugillu suleqatigissallugit periarfissaqartarmata.

Naalakkersuisut Siulittaasuisa oqallinneranni qulequtarineqarpoq ukiuni aggertuni ”nunani avannarlerni suleqatigiinnerup qaninnerulernissaanut periarfissat.” Nunani avannarlerni pisortatigoortumik suleqatigiinnermut tunngatillugu Naalakkersuisunut ilaasortap Knud Kristiansenip tikkuarpaa, takornariaqarnermik suliaqarnermi suleqatigiinneq, ukiorpassuarni Nunat Avannarliit Siunnersuisoqatigiiffiata ataani sulinermi ersarissuusimanngitsoq. Pissutsit taamaapput, naak massa nunani avannarlerni arlalinni, piffissami aggertumi inuussutissarsiutitigut ineriartupiloortitsinissaq aggeraluttuaraluartoq. Suleqatigiinnermut Ministerit ilisarnaasiinissamut suliniutaat tapertaassagaluarpoq, taamaattorli malunnaateqarnerusumik takornariaqarneq pillugu suleqatigiinneq iluaqutaanerpaassasoq qularnanngilaq.

”Nunat Avannarliit suleqatigiinnerat tunngavigalugu suleqatigiinnissarput pitsaassaqaaq, neriuppungalu ukiuni aggertuni takornariaqarneq pillugu Nunat Avannarlerni Naalakkersuisut Siunnersuisoqatigiiffiat aqqutigalugu nukittunerusumik suleqatigiinneq pilersinneqarumaartoq” Knud Kristiansen oqarpoq.

Sukumiinerusumik paasisaqarusukkussi attavissat:

Naalakkersuisup allattaa Jensine Berthelsen +299562303 jebe@nanoq.gl
Siunnersortaaneq Jørgen S. Søndergaard +4540343123 jss@ghsdk.dk