Kikkut tamarmik immikkoortitaannginnissaq pisinnaatitaaffigaat

”Inuttut pisinnaatitaaffiit pillugit Instituttip nalunaarusiaa ”Kalaallit Danmarkimiittut naligiimmik pineqarnissaat” uummatinni artorsarlunga atuarpara”, oqarpoq Pinngortitamut, Avatangiisinut Inatsisinillu Atuutsitsinermut Naalakkersuisoq Mala Høy Kúko. ”Kalaallinut tunngasut aallunneqarnissaat pingaaruteqartoq isumaqarpunga, aammalu nalunaarusiap saqqummiunneqarnerani danskit naalakkersuisui peqatigalugit ataatsimoorluta kalaallit Danmarkimi pitsaanerusunik atugaqartinneqalernissaannut pitsaasunik periarfissaqalerpugut” itisiliivoq.

”Innuttaasut ataqqineqarlutik ataqqinnittumillu pineqarnissaat uannut pingaaruteqarpoq. Inatsisinik atuutsitsinermut suliassaqarfimmi innuttaasut pitsaanerusunik atugaqartinneqalernissaat pisinnaatitaaffiisalu qulakkeernissaat pisariaqartinneqarpoq. Tamanna danskit inatsisinik atuutsitsinermut ministeriat Søren Pind suleqatigalugu sulissutigaara, taannalu sisamanngorpat naapittussaavara. Danskit naalakkersuisui peqatigalugit inatsisinik atuutsitsinermut suliassaqarfimmi inatsisit nunatsinni innuttaasunut iluaqutaasumik nutarterneqarsinnaanissaat ilungersuutigaara” naggasiivoq Pinngortitamut, Avatangiisinut Inatsisinillu Atuutsitsinermut Naalakkersuisoq Mala Høy Kúko.

Paasissutissanik annertunerusunik piniarnermi attaveqarfigineqassaaq Naalakkersuisup allattaa Elise Uupi Kuitse, oqarasuaat 345414, imaluunniit immikkoortortaqarfimmi pisortaagallartoq Karen Anne Arleth, oqarasuaat + 45 30 30 72 54.