Doris Jakobsen Reykjavikimi ataatsimiinnermi peqataavoq

Naalakkersuisoq Doris Jakobsen marlunngornermi nunanut avannarlernut naalakkersuisut Reykjavikimi ataatsimiinneranni peqataavoq. Ataatsimiinneq ingerlanneqarpoq Nunat avannarliit siunnersuisoqatigiivisa ataatsimeersuarneranni.

Nunani avannarlerni ineriartortitsilluni suleqatigiinnerup ingerlaannarnissaa Nunanut avannarlernut naalakkersuisut aaliangiuppaat, nunat suleqatigiinnissamut kissaataat naleqqussarneqarniassammata. Qulequttat ilaat suleqatigiissutigineqarsinnaasut taaneqartut tassaapput takornariaqarnikkut ineriartortitsineq, attaveqaqatigiinnermut aamma qarasaasiakkut – ineriartortitsinikkut atuinikkullu.

”Kalaallit Nunaat suleqatigiinnermi suliniutinut ingerlasunut akuullualereernikuuvoq, kisianni kissaatigivarput nunani avannarlerni takornariaqarnikkut suleqatigiinnerup politikkikkut eqqartugassani immikkut ersarinnerumik sammineqarnissaa.

Ukioq manna danskit siulittaasoqarfiata Kina-mut Kangianullu takornariaqarneq pillugu suliniutaannut akuuvugut, ukiullu tulliani nunat avannarliit annertuumik ataatsimoorussilluta nittarsaassinissamut toqqammavissatsinnut aamma ilaassalluta,” Naalakkersuisog Doris Jakobsen oqarpoq.

”Akornatsinni nunat avannarliit suleqatigiinnerannut ministerit ataatsimoorlutik takorluugaat 2014-imeersoq aallaavigaarput, tassani Nunat Avannarliit nuimasut avammullu sammisut inissaqartinneqarluarput. Uagutsinnut takornariaqarnikkut suleqatigiinneq sammineqarnerunissaa pingaartuuvoq, taamaalilluta uagut nammineq takornariaqarnikkut ineriartortitsinerput nunat avannarliit suleqatigiinnerata iluaniit isumassarsianik ikorfartorsinnaavarput, uagullu misilittakkatsinnik ataatsimoorluni pilersaarusiami tapersiisinnaalluta,” Doris Jakobsen oqarpoq.

Ataatsimiinnermut peqataaneq sapaatip akunnerani qaangiuttumi Nuummi Hallo Nordenip ammaanersiorneqarnerata eqqaaneqarnissaanut periarfissiivortaaq, Kalaallit Nunattalu tungaaninngaak erseqqissarneqarpoq suliaq tamanna ukiuni aggersuni nukittorsarneqarnissaa naatsorsuutigineqassasoq.

Paasisaqarnerorusulluni attavigisassaq: siunnersorti Jørgen Søndergaard, +45 40 34 31 23 imal. allatsi Rosa Thorsen, +299 55 33 03