Anguniagaqarfiusumik silap pissusaanut isumaqatigiissuteqarusuttut

Nunat avannarliit anguniagaqarfiusumik silap pissusaanut isumaqatigiissuteqarnissamik kissaateqarput

Pinngortitamut Avatangiisinut Inatsisinillu Atuutsitsinermut Naalakkersuisoq, Mala Høy Kúko-p, ullumi 28. oktober 2015 nunani avannarlerni avatangiisinut aamma silap pissusaanut ministerit suleqatini Island-imi Reykjavík-imi ataatsimeeqatigai. Ataatsimiinnermi nunani avannarlerni ministerit ataatsimoorussamik nunani avannarlerni silap pissusaanut nalunaarummik akuersissuteqarput, tassani 2015-imi decembarimi Paris-imi silap pissusaa pillugu ataatsimeersuarnissamut pisussamut anguniagaqarfiusumik silap pissusaanut isumaqatigiissuteqarnissamik Nunat avannarliit kissaateqartut sakkortuumik takutinneqarluni. Tassani silap pissusaanut gassimik aniatitsineq silap pissusaanik allanngoriartortitsisoq, qanoq ilinnuni killilerniarneqassanersoq, nunarsuarmi nunat isumaqatigiinniartussaapput.

Avatangiisinut aamma silap pissusaanut ministerit akornanni oqaloqatigiinnermut atatilluguI Pinngortitamut Avatangiisinut Inatsisinillu Atuutsitsinermut Naalakkersuisoq Mala Høy Kúko erseqqissaavoq:

”Issittumi silap pissusaata allanngoriartornera Kalaallit Nunaanni annertoorujussuarmik malugineqarpoq, taanna inuussutissarsiutitsinnut nalinginnaasunut, soorlu aalisarneq piniarnerlu, unammilligassaqartitsilerluni. Nunat avannarliit anguniagaqarfiusumik silap pissusaanut isumaqatigiissuteqarnissamik kissaateqarnerat Naalakkersuisut tapersersorpaat, kisianni erseqqissarlugu nunat suliffissuaqarfiusut silap pissusaani gassinik aniatitsinerup killilersimaarnissaanut pingaarnertut akisussaasuusariaqartut”.

 

Paasisaqarnerorusuttut attavigisinnaavaat Naalakkersuisoqarfimmi pisortaagallartoq Mette Skarregaard Pedersen oqarasuaat (+299) 529844.

Sila pissusaa pillugu isumaqatigiissut pillugu paasisaqarusuttut attavigisinnaavaat sila pissusaanik ilisimasalik Pernille Bengtsen oqarasuaat (+299) 345161.