Vittus Qujaukitsup Kinap avannaani biilinut misileraasarfiit pulaarpai

Inuussutissarsiornermut, Suliffeqarnermut, Niuernermut Nunanullu Allanut Naalakkersuisup Vittus Qujaukitsup angalaqatinilu Kinap avannarpasinnerusortaani ukiukkut biilinut misileraasarfiit marluk tikeraarlugit Kinamut angalanertik aallartippaat. Biilinut misileraasarfiit marluk taakkua, ATM-imit aamma BOSCH-imit pigineqartut, ligger i Yakeshimi Ruslandip aamma Mongoliap killeqarfiinut 300 km-isut ungasissusilimmi inissisimapput.

”Kinap avannaani sumiiffik Kangerlussuarmut assingusorujussuuvoq, tassami sumiiffinni marlunni taakkunani piffissani sivisoorujussuarni sila unerisimalluni nillertarpoq. Kalaallit Nunaani biilinut misileraasarfeqarnissamut tunngatillugu periarfissat pissanganartorujussuupput, aammalu periarfissat taakkua erseqqinnerusumik takorusullugit Kinamiippugut” oqarpoq Vittus Qujaukitsoq.

Yakeshi aasaanerani takornariarneqangaatsiartarpoq, kisianni ATM-ip misileraasarfimmik pilersitsinissaa tikillugu ukiukkut tikeraartoqanngingajavittarsimalluni. Tamanna maannakkut allanngorsimavoq, taamaalilluni akunnittarfiit aamma timmisartuutileqatigiiffiit mannakkut ukiukkut aamma suliassaqarnerpaajusalersimallutik.

Sammisassaq taannatut ittoq Kalaallit Nunaanni ukiup taamaalinerani taamaallaat killilimmik takornariartoqartaraluartoq, nutaanik sammisassaqartitsilersinnaassaaq.
Kalaallit Nunaanniit angalaqatigiit tamatuma saniatigut biilinut misileraasarfimmik inissiisimaneq najukkami inuiaqatigiinnut qanoq iluaqutasimanersoq erseqqinnerusumik tusagaqarfiginiarlugu, Yakeshimi najukkami borgmesteri naapippaat. Borgmesteri oqaluttuarpoq misileraasarfimmik pilersitsineq, nutaanik suliffissaqartitsinikkut aammalu tusagassiortunit annertoorujussuarmik sammineqarneratigut, illoqarfimmik annertuumik qaffassaasimasoq.

Angalaqatigiit Beijingimut ingerlaqqissapput, tassani ulluni tulliuttuni suliffeqarfinnik aamma aningaasaliisarnermut sullissivinnik ataatsimeeqateqarnerit ingerlanneqassallutik, kiisalu Beijingimi danskit sinniisoqarfianni tuniniaanissamik nittarsaassilluni saqqummiisoqassalluni.

Annertunerusumik paasisaqarusunnermi Naalakkersuisumut allatsi Nauja Møller oqarasuaammut angallattakkamut 544142-imut attaveqarfigineqassaaq.