Naalakkersuisut Siulittaasuata tullia ataatsimeersuarnermi peqataavoq

Naalakkersuisut Siulittaasuata tulliata aappaa Nunat Avannarliit Siunnersuisooqatigiiffiata 67-issaanik Reykjavik-imi ataatsimeersuarnerani peqataavoq

Naalakkersuisut Siulittaasuata tulliata aappaa, Knud Kristiansen Nunat Avannarliit Siunnersuisoqatigiiffiata ataatsimeersuarnerani Naalakkersuisut Siulittaasuat Kim Kielsen pissutissaqavilluni pisinnaajunnaarsimasoq taarserlugu peqataavoq.

Ataasinngornermi Naalakkersuisup Knud Kristiansenip Savalimmiut aammalu Ålandimiut aallartitaat ataatsimeeqatigissavai. Nunat Avannarliit Siunnersuisoqatigiiffiisa ataatsimiinnerini nunat Naalakkersuinikkut siuttuisa ataatsimiinnissaannut atatillugu nunat namminersorlutik ingerlasut pingasut taakku ataatsimiittarnerat ileqquuvoq., Nunat Avannarliit Siunnersuisoqatigiiffiata aammalu Nunat Avannarliit suleqatigiinnerannut Naalakkersuisut ataatsimeeqatigiinnerisa nalaanni Nunat taakku namminersorlutik ingerlasut ataatsimeeqatigiittarnerat suleqatigiinnermut immikkuullarissumut takussutissiisuuvoq.

Marlunngorpat Nunat Avannarliit Siunnersuisoqatigiiffiata ataatsimeersuarnerani ataatsimut oqallinnermi Naalakkersuisut peqataassapput, taamatuttaaq Islandip Præsidentiata tikilluaqqullugit qaaqqussavai.

Nunat Avannarliit Naalakkersuisuisa Siulittaasuisa ataatsimiinneranni nunat avannarliit akornanni killeqarfiit innuttaasunut aammalu inuussutissarsiornermik ingerlataqartunut killiliisarneri nungusarniarneragaasut nangittumik oqaluuserineqassapput iliuusissatullu siunnerfiit nutaat oqaluuserineqassallutik, tamatuma saniatigut Nunat Avannarliit akornanni suleqatigiinnerup nutarterneqarnissaa nangittumik sulissutigineqarnissaa pillugu oqaluuserinnittoqassalluni.

Nunat Avannarliit Siunnersuisoqatigiiffiata aammalu Nunat Avannarliit Naalakkersuisuisa siulittaasuisa akornanni oqallisigineqassaaq ”qaninnerusumik annertunerusumillu nunat avannarliit siunissami suleqatigiilernissaat.”

”Nunat Avannarliit Siunnersuisoqatigiiffiata marlunngorpat ataatsimiinnissaanut assut qilanaarpunga, tassani nunani avannarlerni Naalakkersuisut Siulittaasuisa siunissami suleqatigiinnerup ilusissaa pillugu siunnerfigerusutaminnik oqallittussaammata.” Knud Kristiansen oqarpoq.

”Soorlu Inatsisartut ukiaanerani ataatsimiillutik aallartimmata Naalakkersuisut Siulittaasuata erseqqissaatigereeraa, Nunani Avannarlerni suleqatigiinneq Naalakkersuisut pingaartittupilorujussuuvaat, tassanimi suleqatigiinnermi Naalakkersuisutigut aammalu Inatsisartoqarnermik aallaavilimmik nammineerluta toqqaannartumik peqataasaratta. Ukioq 2015 uagutsinnut immikkuullarissuusimavoq, tassunga pissutaavoq Danmark Nunat Avannarliit Ministeriisa Siunnersuisooqatigiiffianni siulittaasuusimammat, tamatumalu periarfississimammatigut Kalaallit Nunatsinni ataatsimiinnernik ingerlatsinissatsinnut aammalu suliniutinut soqutiginarluinnartunut nunarput peqataasinnaasimammat, soorlu assersuutigalugu Pinngortitaleriffiup Kalaallit Nunaata Kangiani immap naqqani misissuinerit ingerlassinnaasimammagit” Knud Kristiansen naggasiivoq.

Knud Kristiansen-ip peqataanerata saniatigut Nunat Avannarliit Suleqatigiinnerannut Naalakkersuisoq Doris Jakobsen peqataavoq. Tamatumalu saniatigut Ilinniartitaanermut Naalakkersuisoq Nivi Olsen, Kulturministerit ataatsimiinnissaannut peqataasussaq aammalu Mala Høy Kúko Avatangiisinut Ministerit ataatsimiinnerannut peqataassallutik najuupput.

Annertunerusumik paasisaqarusuttunut saaffissaq:
Naalakkersuisup allattaa Jensine Berthelsen +299562303 jebe@nanoq.gl
Siunnersortaaneq Jørgen S. Søndergaard +4540343123 jss@ghsdk.dk