Kaffemik i Nordens Hus I Reykjavik for Grønlændere i Island

Nunat Avannarliit Suleqatigiinnerannut Naalakkersuisoq Doris Jakobsen kalaaleqatit sapaammi 25. Oktober Nordens Husimi Reykjavikkimiittumi kaffillerfigai.

Kalaallit Nunaata Nunat Avannarliit Siunnersuisooqatigiiffiata Katersuunnissaannut aallartitai, ilaatigut Ineqarnermut, Sanaartornermut Attaveqarnermullu Naalakkersuisoq Knud Kristiansen aamma Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoq Nivi Olsen kiisalu Nunat Avannarliit Siunnersuisooqatigiivini Inatsisartuni ilaasortaatitat Ineqi Kielsen, Siumut, aamma Iddimanngiiu Bianco, Inuit Ataqatigiit, kaffisortitsinermi peqataapput.

Doris Jakobsenip aaqqissuussaq nuannaarutigaa.

Kaffillerneq iluatsilluaqaaq, kalaallit Islandimi najugaqavissut katersuunnertik iluatsillugu ulluinnarni kalaaliusutut ajornartorsiutit pitsaaqutillu naapittagaat oqaloqatigiissutigaat. Tassani danskit Reykjavikkimi aallartitaqarfiat nersualaarneqarpoq:

”Kalaallit maani nunaqavissut danskit Reykjavikkimut aallartitaat nuannaarutigaat. Kalaallit maanga nuuttut Kalaallit Nunaata, Danmarkip Islandillu akornanni aporfeqalersinnaasarput. Malugisinnaavara kalaallit maani nunaqavissut aaqqissuussaanissartik amigaatigigaat. Katersuuffissamik ilinniartitaanermut, innuttaassutsimut tunngasunik, utoqqalinersiuteqarnermut nutserinermullu tunngasunut ajornartorsiutinut oqalliffissaminnik amigaateqarput. Naapeqatigiinneq inuppalaartoq nuannerpoq pissarsiaqarnarlunilu”, Doris Jakobsen oqarpoq.

Kalaallit 30-t ilaqutaallu kaffillernermi peqataapput.

Annertunerusumik paasisaqarusukkuit attavigisinnaavat naalakkersuisup allattaa Rosa Thorsen oqarasuaat +299 55 33 03