Naalakkersuisuunera atornerlunngilara

Partiit illuatungiliuttut Partii Naleraq aamma Inuit Ataqatigiit Nuuk TV-ata tallimanngornermi oktobarip 23-anni ilanngutassiaani piumasaqarlutik nalunaarput Aalisarnermut, Piniarnermut Nunalerinermullu Naalakkersuisutut ilaasortaajunnaartariaqartunga. Naliliinertik naapertorlugu Aalisarnermut, Piniarnermut Nunalerinermullu Naalakkersuisoqarfik uangalu 2015-imut avaleraasartuunut agguaassinissamut ingerlatsinermi pissaanermik atornerluisuunerarluta. Illuatungiliuttut taama piumasaqarput Deloittep 2015-imut avaleraasartuut pillugit ingerlatsinermut misissuinerata saqqummiunnera atuaqqissaareersimallugu.

Nuuk TV aamma ilisimatitsivoq suliamut atatillugu illuatungiliuttut qisuariaataat tunngavigalugit oqaaseqartitsiniarlutik saaffiginnittarsimagaluarluni. Nuuk TV-mit saaffigineqarsimannginnama erseqqissaassutigissavara, Naalakkersuisoqarfimmi aamma atorfilittat ilisimatitsipput pisumut atatillugu, Nuuk TV-mit oqaatigineqarnerattut, Nuuk TV-mit saaffigineqarsimanngillat.

Naqissuserlugu erseqqissarusuppara aalisarnermik inuussutissarsiortut ilaat nammineerlungalu qanigisama arlaannaalluunniit salliutinniarlugit periar-fissarsiuussisimannginnama. Ingerlatsinermut kukkunersiuisut, arlanulluunniit attuumassuteqanngitsut, kukkunersiuinerminni taama aamma erseqqissaassuteqarput.

Erseqqissarusuppara nalunaarusiami qinnuteqaateqartut pillugit allaffissornermi pissusiusimasut pillugit oqaatigineqartut nammineerlunga Naalakkersuisoqarfimmiillu tusaatissatut tigugatsigit.

Qularutigineqassanngilaq avaleraasartoortassat agguaanneqarmata sukkulluunniit peqataannginnama. Ilanngutassiami saqqummiunniarneqarpoq agguaassinissamut tunngavigineqartussat suliarineqarmata KNT salliutitassatut periarfissiuussimagiga. Eqqortorli tamanit ilisimaneqartoq tassaavoq qinnuteqaateqartunut namminneerlutik umiarsuaateqanngitsunut periusissaq, soorlu KNT-mut aamma atuuttuusimasumut tassaammat, periuseq siornamiit ingerlateqqitaaginnartuummat atuuttooreersoq.

Periusissatut tunngavigineqartoq sinerissap qanittuani aalisarsinnaanermut akuersissuteqartunit tunngavilersuiffigineqarnissaa KNAPK-mit kissaatigineqartoq naapertorlugu suliaavoq. Naalakkersuisut sinerissap qanit-tuani aalisartunut amerlanerpaanut avaleraasartoorniarnermi aalisarnermi peqataatitsisoqarnissaa siunertaralugu aalajangiunneqarluni.

Tamannarpiaq tunngavigalugu Halibut Greenland Pelagic aamma pisassinneqarneranut tunngaviuvoq. Erseqqissarneqassaaq qinnuteqaateqartut tamarluinnarmik aatsaat qinnuteqarfissatut killissarititaasup maajip arferngata 2015-ip kingorna suliaralugit aallartinneqarmata.

Aalisarnerup ingerlanneqarnissaa Naalakkersuisunut ilaasortatut akissussaaffigaara. Akisussaaffillu tamanna timitalimmik pimooruppara. Soorunalimi suliaqarfimmi aalajangersagassat suliarineqarneranni peqataasarpunga, tamatumani sulianik isumaginninnermut inatsit ataqqillugu.

Eqqorpoq apriilimi agguaassinissamut periusissat suliarineqartillugit aalajangersaanermi peqataagama, tamanna akisussaaffigigakku soorunalimi peqataavunga. Aalajangersaanermulli peqataanera kingusinnerusukkut suliamut attuumassuteqarlunga nalunaaruteqarninnut attuumatinneqassanngilaq. Kukkunersiuisut nalunaarusiaanni atuarneqarsinnaavoq KNT qinnuteqarsimasunut ilaasoq ilisimatinneqarama erngerlunga attuumassuteqarnera nalunaartigaara.

"Ingerlatsinermik kukkunersiuilluni misissuineq 2015-imi avaleraasartuunit pisassiissutit" pillugit nalunaarusiaq uani atuarneqarsinnaavoq.

Inussiarnersumik inuulluaqqusillunga
Aalisarnermut, Piniarnermut Nunalerinermullu Naalakkersuisoq, Karl-Kristian Kruse

Attavigineqarsinnaavoq Aalisarnermut, Piniarnermut Nunalerinermullu Naalakkersuisoqarfimmi pisortaq, Jørgen Isak Olsen. Mail: jio@nanoq.gl