Naalakkersuisup sumiginnaanerit kinguaassiutitigullu atornerluinerit akiorpai

Naalakkersuisut meeqqat inuusuttullu kinguaassiutitigut atornerlunneqarsimasut ikiorneqartariaqarnissaat anguniagarivaat. Taamaattumik meeqqanut inuusuttunullu kinguaassiutitigut atornerlunneqarsimasunut Naalakkersuisut suliniutertik nukittorsarniarlugu annertuumik suliniuteqarput, tassani ilanngullugu najukkami ikiorneqarsinnaanissaat qulakkeerniarlugu. Taamaasilluni meeraq inuusuttorluunniit atornerlunneqarsimanermi kinguninngua ikiorneqarsinnaanissaa qulakkeerniarlugu.

2014-imi 2015-imilu kommunini sukannersumik nakkutilliineq ingerlanneqarpoq, taassumalu takutippaa meeqqanut inuusuttunullu suliassaqarfimmi innarluutillillu pillugit suliassaqarfimmi annertuumik sumiginnaasoqarsimasoq. Sakkortuumik nakuusernerit, kinguaassiutitigut atornerluinerit sumiginnaanerillu pillugit nalunaarutiginninnerit suliarineqanngitsut, kommunini aaqqissugaanerit iluini ukiorpassuarni uninngasimasut nakkutilliinerit takutippaat.

Isumaginninnermi nakkutilliinerit inerneri pillugit Naalakkersuisut tamarmiusut ilisimatinneqarnikuupput. Meeqqanut inuusuttunullu suliassaqarfiup iluani pissutsit ernumanartoqarnerata kingunerisaanik Naalakkersuit kommunit ingerlatsiviini arlalinni suliatigut aningaasatigullu nukissanik amerlanerusunik illuartitsinikuupput, ilaatigut isumaginninnermi nakkutilliinerup pitsaassusaa nukittorsarniarlugu ilaatigullu kommunini inunnik isumaginninnermut ingerlatsivinni sulisunut siunnersuineq piginnaasanillu qaffassaaneq nukittorsarniarlugit.

Tamanna tunuliaqutaralugu Naalakkersuisut tigussaasunik suliniutinik aallartitsinikuupput:

  • Meeqqat inuusuuttullu kinguaassiutimikkut atornerlunneqarsimasut pillugit suliniutit annertusarnissaat pingaartinneqarpoq, taamaasilluni meeqqat inuusuttullu kinguaassiutimikkut atornerlunneqarsimasut ikiorneqarnissaminnik pisariaqartitsinertik pisinnaatitaaffitsillu pisinnaaniassammatigit.
  • Kommunini sullissisartut assigiinngitsutigut piginnaanngorsarnissaat, tamakku aqqutigalugit aamma kommunit kajumissaarneqassapput meeqqat inuusuttullu atugaasa pitsanngorsarnissaannut.

Tamatuma saniatigut taaneqarsinnaasut ilagivaat sullissisartut sullisseriaatsit oqaloqatiginneriaatsit taamatullu sumiginnaasarnerit, annersaasarnerit kinguaasiutitigullu atornerluisarnerit malitsigisaannillu ajornartorsiutaalersartut pillugit sullisseriaatsit naapertuuttunngorsakkat nutaaliaasullu atorlugit sullissisarnissamut piginnaanngorsarneqarnissaat. Tamatuma saniatigut aallartisarneqarsimapput iliuuseqaatsit assigiinngitsut tamatumuuna aqqutissiuunniarlugu nunatsinni ilaqutariinnut sullissiviit nukittorsaavigineqarnissaat, tassuunatigullu aqqutissiuullugu ilaqutariit, meeqqat inuusuttuaqqallu pitsaanerusumik atugaqalersinnaanissaat.

  • Ilinniartitsinerit assigiinngitsut, iliuuseqaateqarnernilu siunertarineqarluni kommunini sullisseriaatsit pitsanngorsaavigineqarnissaannik aallartitsineq:
    • Siunnersuisarnerni ikiortitut ilinniartitsinerit
    • Isumaginninnikkut siunnersortit ilinniarteqqinneqartarnerat
    • Piffinni assigiinngitsuni isumaginninnikkut siunnersortitut ilinniarsinnaanerit
  • qitiusumik siunnersuisarfik pilersinniarneqarpoq. Tassanngaanniit siunnersuisarnerit assigiinngitsut meeqqanik inuusuttuaqqanillu sullissisarnerni piginnaanngorsaasarnerillu ingerlanneqartassallutik.

Kommunit tungaanut ikorfartuilluni siunnersuillunilu periuseqarnikkut, aamma tamatuma kingunerisimavaa Naalakkersuisut kommunillu akornanni suleqatigiinnerup patajaannerulersimanera.

Inunnik isumaginninnerup iluani piginnaasanik qaffassaaneq sulisunillu amerlisaaneq pillugit suliniuteqarnissaq pillugu Naalakkersuisut siunissaq ungasinnerusoq pillugu Naalakkersuisut qanimut suleqatiginissaannut pisariaqartitsisoqartoq kommunit nassuerutigaat. Tassani pineqarput meeqqanut inuusuttunullu taavalu innarluutilinnut suliassaqarfiit. Tamanna pisariaqarpoq isumaginninnermi unammilligassat annertoqisut aaqqinneqassappata.

Martha Lund Olsen oqarpoq “Allaffeqarfiga piumaffiginikuuara tassunga tunngatillugu nakkutilleeriaatsimik suliassallu suliarineqartarnerat pillugu ineriartortitsissasut” nangillunilu “Sulissutigissavara 2016-imi nangillugu nakkutilliineq annertuumik eqqumaffigineqassasoq suliassaqarfiullu iluani annertusisamik suliniuteqarnissamut nukinnik illikartitsinissara sulissutigissallugu.”

Suliniutit taakkua atorlugit meeqqanik sumiginnaaneq kinguaassiutitigullu atornerluineq pinaveersaartinnissaat taavalu meeqqat ikiorneqarnissaat qulakkeerneqassasoq Naalakkersuisut kissaatigaat.

Annertunerusumik paasisaqarusunnermi saaffigineqarsinnaavoq Martha Lund Olsen allattaa Sina Møller Kristiansen sianerfigalugu oqarasuaat 53 93 71